Bakı Parisə cavab verib, amma Tehrana cavab vermir

Azərbaycan Xarici İşlər Nazirliyi aprelin 2-də mətbuat konfransında Fransanın Avropa və xarici işlər naziri Stefan Sejurnenin Bakının Ermənistana qarşı hərbi eskalasiya hazırlaması və onun ərazi bütövlüyünə təhdidə dair ittihamlarını "yolverilməz" adlandırıb.

Azərbaycan Xarici İşlər Nazirliyinin rəsmi nümayəndəsi Ayxan Hacızadə Fransanın Ermənistanı "sülhsevər ölkə" kimi təqdim etməsini qəbuledilməz hesab edir.

Azərbaycan ərazilərini 30 ilə yaxın müddətdə işğal altında saxlayan, 1 milyona yaxın azərbaycanlını öz doğma torpaqlarından didərgin salan, kütləvi qırğınlar və insanlıq əleyhinə cinayətlər törədən Ermənistanın Fransa tərəfindən sülhpərvər ölkə kimi təqdim edilməsi bu ölkənin həm vasitəçiliyi dövründə, həm də 44 günlük Vətən Müharibəsindən sonra yürütdüyü siyasətin nə qədər saxta olduğunu nümayiş etdirir, Hacızadə deyib.

Bununla yanaşı, Ermənistanın geniş şəkildə silahlanmasını həyata keçirən, bölgədə militarizmi təşviq edən Fransa tərəfinin Azərbaycanı aqqressiv ritorikada təqsirləndirməsi qəbuledilməzdir.

Azərbaycanın BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına (COP29) ev sahibliyi kimi məsul vəzifəni yerinə yetirdiyi bir dönəmdə, ölkənin imicinə xələl gətirmək məqsədi güdən və sədrliyimizi hədəf alan bu kimi çağırışlardan çəkinilməsinin Fransa və dünyamız üçün daha faydalı olacağını hesab edirik.

Məhz Fransa kimi ölkələrin son 30 ildə Ermənistanın təcavüzünü ört-basdır edən siyasətinin heç bir fayda vermədiyi hər kəsə aydın olmalıdır. Bununla, Fransa tərəfi anlamalıdır ki, onun tərəfindən həyata keçirilən bu kimi destruktiv fəaliyyətə nə qədər ki, son qoyulmayıb, bu həm Fransanın zərər görmüş imicinə, həm də hər vəchlə müdafiə etdiyi Ermənistana xeyir gətirməyəcək, Ayxan Hacızadə bildirib.

Eyni zamanda, Azərbaycan Xarici İşlər Nazirliyi İsrailin Bakıdakı səfirliyinə raket zərbəsi endirməyə çağıran iranlı deputatın qalmaqallı bəyanatını şərh etmir.

"Sionistlərin İran torpağına hərbi hücumuna analoji cavabda gecikmək İranın reputasiyasına və şərəfinə ağır zərbəyə bərabərdir. Mənim təklifim odur ki, region ölkələrindən birində, tərcihən Azərbaycanda sionistlərin diplomatik mərkəzlərindən birinə açıq şəkildə hücum edək",- İran parlamentinin deputatı Cəlal Rəşidi X platformasındakı hesabında yazıb.