Bələdiyyələrdə 15035 yer uğrunda 37 175 namizəd mübarizə aparır

Noyabrın 30-dan etibarən 23 dekabr bələdiyyə seçkiləri üzrə seçkiqabağı təşviqat başlayıb. Təşviqat dekabrın 22-də səhər saat 8-də - səsvermənin başlamasından bir gün əvvəl başa çatacaq.

MSK ictimai əlaqələr şöbəsinin rəhbəri Şahin Əsədlinin Turan-a verdiyi məlumata görə, dekabrın 1-nə olan məlumata görə, 1607 bələdiyyədə 15035 yer uğrunda 37 175 namizəd mübarizə aparacaq.

Onların arasında 8 siyasi partiyanın – Yeni Azərbaycan, Ana Vətən, Vətəndaş Həmrəyliyi, Ümid, Sosial-Demokrat, Milli Dirçəliş Hərəkatı, Demokratik İslahatlar və Böyük Quruluş partiyalarının namizədləri var.

Namizədliyini özü irəli sürənlər də nəzərə alınmaqla, namizədlər arasında 30 siyasi partiyanın üzvləri var.

Seçki Məcəlləsinə əsasən, 60-dan çox seçki dairəsində və ya bələdiyyələrin ümumi sayının yarısında qeydiyyatdan keçmiş namizədi olan siyasi partiyalar İctimai Televiziya və radioda pulsuz təşviqat hüququ qazanacaq.

Əsədlinin sözlərinə görə, bu il yeganə belə partiya hakim Yeni Azərbaycan Partiyasıdır. Digər partiya nümayəndələrinin belə imkanının olmadığını nəzərə alaraq, YAP pulsuz efirdən imtina edib. -06B-