Bərdənin atəşə tutulması zamanı BQXACF könüllüsü həlak olub

Bakı/29.10.20/Turan: Dünən Bərdə şəhərinin atəşə tutulması zamanı Beynəlxalq Qızıl Xaç və Aypara Cəmiyyətləri Federasiyasının (BQXACF) könüllüsü, iki uşaq atası həlak olub. Bu barədə prezidentin köməkçisi Hikmət Hacıyev Tvitter hesabında yazıb. Onun adı açıqlanmır.

Beynəlxalq Qızıl Xaç Komitəsinin (BQXK) Avrasiya regionu üzrə direktoru Martin Şüep mərhumun ailəsinə başsağlığı verib.

“Minlərlə mülki şəxslə bərabər  BQXK bu gün cəbhə xəttinin hər iki tərəfində ölüm hallarına, yaralanmalara və dağıntılara səbəb olan yaşayış yerlərinin intensiv şəkildə mərmi atəşinə məruz qalmasına şahid olub. Bu, qəbuledilməzdir. Təəssüf ki, Azərbaycan Qızıl Aypara Cəmiyyətinin könüllüsü, iiki uşaq atası da bu atışmalarda həyatını itirib. Daha iki könüllü isə yaralanıb. BQXK könüllünün ailəsinə və Azərbaycan Qızıl Aypara Cəmiyyətinə dərin hüznlə başsağlığı verir”, - bəyanatda deyilir.

“Sentyabın sonunda  gərginləşmənin yenidən başlamasından etibarən BQXK tərəfləri mülki şəxsləri və xəstəxana, məktəb, market və mədəni abidələr kimi mülki infrastrukturu fərqləndirmək və müdafiə etmək üçün lazım olan bütün mümkün tədbirləri görməyə çağırıb. Bunlar könüllü olaraq görülə biləcək tədbirlər deyil. Bunlar beynəlxalq humanitar hüquq əsasında müəyyən edilmiş öhdəliklərdir”, - Şüep bildirib.

“Son hadisələr onu göstərir ki, Dağlıq-Qarabağ münaqişəsinin nəzarət altından çıxma riski mövcuddur. Regionda yaşayan mülki şəxslər bu hadisələrin fəsadlarından əziyyət çəkirlər. Mülki şəxslərin ölüm halları narahatedici həddə çatıb. Bununla bərabər, onlar bütün həyatlarını dəyişən yaralanmalara məruz qalırlar. Eyni zamanda, xəstəxanalar da daxil olmaqla mülki infrastruktura əhəmiyyətli dərəcədə ziyan dəyib.

BQXK tərəflərə beynəlxalq humanitar hüquq əsasında öhdəliklərini xatırlatmaq üçün ikitərəfli, konfidensial dialoq aparır. Şahidi olduğumuz bu dəhşətli mənzərə davam edə bilməz”, - bəyanatda deyilir.06D-