Beynəlxalq təşkilatlar Xədicə İsmayılovanın həbsini kəskin şəkildə pisləyiblər

Aparıcı beynəlxalq hüquq müdafiə təşkilatları dekabrın 5-də Bakıda məşhur jurnalist, “Azadlıq” radiosunun icmalçısı Xədicə İsmayılovanın həbsini pisləyiblər.

Amnesty International öz bəyanatında baş verənləri “mətbuat azadlığına ən kobud hücum” adlandırır.

Xədicə İsmayılova Azərbaycanda son müstəqil səslərdən biridir. Onun həbsi jurnalisti susdurmaq cəhdlərinin son halqası oldu”, deyə təşkilatın nümayəndəsi Con Dalusen bildirib.

Özünü öldürmə həddinə çatdırma ittihamı təəcüblü və gülməli görünür, lakin o, 3 ildən 7 ilədək azadlıqdan məhrum edilə bilər, deyə bəyanatda qeyd edilib.

Digər beynəlxalq təşkilat - Human Rights Watch da İsmayılovanın həbsini ölkənin tənqidi səslərinə ciddi zərbə hesab edir. Azərbaycan hakimiyyəti öz ünvanına tənqidin tamamilə boğulması səylərini birləşdirir, deyə HRW nümayəndəsi Georgi Nodiya bildirib.

O, həmçinin qeyd edib ki, həbs Prezident Administrasiyasının rəhbəri Ramiz Mehdiyevin Xədicə İsmayılovanı açıq-aşkar Azərbaycanın “maraqlarını” satmaqda ittiham edən və onu “beşinci kolonna” – xarici pullarla və Qərbin tapşırığı ilə ölkədə sabitliyi pozmaq istəyən QHT-lər siyahısına aid edən böyük məqaləsinin nəşrindən bir gün sonra baş verib.

Bir aydan çoxdur ki, beynəlxalq təşkilatlar rəsmi Bakını vətəndaş cəmiyyətini dağıtmağa son qoymağa və uydurma ittihamlarla həbs olunmuş 50-dən çox fəalı, jurnalisti və blogeri azad etməyə çağırır.

“Buna cavab olaraq hakimiyyət İsmayılovanı həbs etdi və bu, son damla olmalıdır. Qərbli tərəfdaşlar Azərbaycan hakimiyyətinə aydın şəkildə bəyan etməlidirlər ki, onlar hamısı azad edilməyənə qədər əvvəlki əlaqələr və münasibətlər olmayacaq”, deyə bəyanatda bildirilir.

“Sərhədsiz reportyorlar” mətbuat azadlığını müdafiə təşkilatı adı dünyada 100 söz azadlığı müdafiəçisi siyahısına daxil edilmiş olan İsmayılovanı dərhal azad etməyə çağırıblar.

“Ona qarşı saxta ittihamlar bizi heyrətə salıb. İsmayılovaya qarşı böhtan kampaniyası iki il əvvəl başlayıb və indi pik həddinə çatıb. Azərbaycanda korrupsiya faktlarının aparıcı araşdırmaçılarından birinin həbsi hakimiyyətin qanunsuz əməlləri ifşa edən hər kəsi tamamilə boğmaq niyyətində olduğunu göstərir”, deyə təşkilatın bəyanatında qeyd edilir.

“Sərhədsiz reportyorlar” həmçinin qeyd edirlər ki, həbs Ramiz Mehdiyevin Xədicə İsmayılovanı dostlarının (Qərbə işarə edərək) xahişi ilə Azərbaycan haqqında düşməncəsinə məlumat yaymaqda ittiham edən məqaləsinin dərc olunmasından bir gün sonra baş verib.

Hər üç təşkilat İsmayılovanın dərhal azad edilməsini tələb ediblər və dünya ictimaiyyətini müdaxilə etməyə çağırıblar. -02D-