B.İvanişvili: Bakı-Tbilisi-Qars dəmiryolu layihəsi ilə bağlı heç bir problem yoxdur

Gürcüstanın baş naziri Bidzina İvanişvili Azərbaycana səfəri zamanı bir neçə gün əvvəl Bakı-Tbilisi-Qars dəmiryolu layihəsi barədə dediklərini rədd edib.

«Mən bir qədər ehtiyatsızlıq edib dedim ki, Bakı-Tbilisi-Qars dəmiryolunun işə düşməsi Gürcüstan dəmir yolları ilə yük daşınması həcmini azalda bilər», - deyə İvanişvili çərşənbə günü baş nazir Artur Rasizadə ilə danışıqlarının yekunundakı brifinqdə bildirib.

İvanişvili qeyd edib ki, prezident İlham Əliyev ilə görüşü zamanı “bu məsələdə bir qədər tələsdiyini” etiraf edib. Əslində heç bir problem yoxdur, deyə o bildirib. «Sadəcə, mənim bəyanatım bir qədər tələsik olub», - deyə İvanişvili əlavə edib.

Onun sözlərinə görə, prezident Əliyevlə görüş “dostluq və qardaşlıq şəraitində” keçib. O həmçinin Əliyevlə Azərbaycanın nəql etdiyi qazın və ixrac edilən elektrik enerjisinin tarifləri ilə bağlı məsələləri müzakirə etdiyini bildirib.

İvanişvili Gürcüstanın perspektivdə Azərbaycandan aldığı elektrik enerjisi həcmləri artırmaq niyyətini də açıqlayıb. Bir qədər əvvəl Gürcüstan mətbuatına müsahibəsində İvanişvili bəyan edib ki, Bakı-Tbilisi-Qars dəmir yolunun tikintisinin Gürcüstan limanları və Gürcüstanın özünün dəmir yolundan daşınan yüklərin azalmasına səbəb ola bilər və məlumat verib ki, Bakıya səfəri zamanı bu məsələni Azərbaycan rəhbərliyi ilə müzakirə etmək niyyətindədir. Bundan əlavə, Tbilisidə BTQ layihəsinin dəyərinin 220 mln-dan 775 mln dollara qədər artırılması məsələsi qaldırılıb. Ancaq bu barədə tərəflər Bakıda bir kəlmə belə danışmayıb. –0—