Böyük Azərbaycan Uğrunda Milliyyətçi Hərəkat Partiyasının bəyanatı

Bakı/24.09.16/Turan:”Korrupsiyalaşmış YAP iqtidarı hakimiyyətdə olduğu 23 il ərzində yürütdüyü yanlış siyasət nəticəsində dövlətçiliyimizi potensial təhlükə ilə üz-üzə qoyub. Ölkədə hökm sürən avtoritar rejim və bu rejimin başında duran xainlər bu illər ərzində Azərbaycan xalqına yer üzündə nə qədər pislik var hamısını etdilər. Buna əlavə şərhə ehtiyac yoxdur. Azərbaycan xalqı vətəni sevən qeyrətli xalqdır. Bunu 2 aprel 2016-cı il tarixdə şanlı ordumuzun erməni terrorçu-quldur dəstələrinə qarşı keçirdiyi uğurlu hərbi əməliyyatlar bir daha sübut etdi. Bu,  xalqın qələbəsi idi. Iqtidarın qələbəsi deyildi. Bütün Azərbaycan xalqı ayağa qalxmışdı. Hamı bir nəfər kimi Azərbaycan dövlətinin ərazi bütövlüyünün bərpası naminə müqəddəs savaşa hazır vəziyyətdə idi. Bunu bütün dünya gördü. Azərbaycan xalqı güclü və yenilməz olduğunu tarix boyu dəfələrlə sübut edib. Bu xalqın başında vətənpərvər qətiyyətli, ləyaqətli rəhbər dursa nəinki Qarabağı, bizim haqqımız olan İrəvanlı, Təbrizli, Dərbəndli bütün tarixi torpaqlarımızı işğaldan, müstəmləkədən azad edib geri alar. Yetər ki, dövlətin başında duranlar bu millətə sahib çıxmasınlar. Xalq Allahın padşahlara əmanətidir. Əmanətə xəyanət edənlərin aqibəti çox pis olur”. Bu barədə Böyük Azərbaycan Uğrunda Milliyyətçi Hərəkat Partiyasının bəyanatında deyilir.

 Bəyanatda qeyd olunur ki, avtoritar rejim ölkədə hər şeyi dondurub. Dövlətin inkişafı üçün zəruri olan bütün sahələr iflic vəziyyətdədir. Iqtisadiyyat çöküb. Kənd təsərrüfatı məhv edilib. YAPçı məmurlar tərəfindən büdcə vəsaiti xaincəsinə dağıdılır. Milli sərvətlərimiz talan edilib. Xalqın böyük əksəriyyəti ehtiyac içində boğulur. Iqtisadiyyatın bütün sahələri bir ovuc yüksək çinli məmur tərəfindən inhisara alınıb. Heç kəs Azərbaycana sərmayə qoymaq istəmir. Məmur özbaşınalığı, haqsızlıq, bürokratik əngəllər xalqı təngə gətirib. Yüz minlərlə insanın yaşamağa evi, yatmağa yeri, yeməyə çörəyi yoxdur. Intiharların sayı hər gün artır. Ölkə sosial partlayış həddinə çatıb. Bütün sahələrdə tezliklə islahatların keçirilməsinə ehtiyac var. Xalqın artan qəzəbindən qorxuya düşən iqtidar eşelonu rejimin ömrünü uzatmaq üçün bütün zorakı metodlardan və çirkin vasitələrdən istifadə edir. Prezident İlham Əliyev başını itirib. Nə etdiyini və nə edəcəyini bilmir. İslahatlara başlamaq əvəzinə repressiyalar keçirir. Ölkə polis dəyənəyi ilə idarə olunur. Vətəndaşların sərbəst toplaşmaq hüququ əlindən alınıb. Tərpənənin başını əzirlər. Tənqid edənin dilini kəsirlər. Avtoritar rejimin zülmünə, özbaşınalığına etiraz edənlər ən yaxşı halda həbslərdə çürüyür. Bu gün mənəviyyatımız terrora məruz qalıb. YAP iqtidarı hakimiyyətdə olduğu illər ərzində milli, dini, mənəvi dəyərlərimizi məhv etdi.

“Iqtidar eşelonu prezident İlham Əliyevin təşəbbüsü ilə dövlətin Konstitusiyasını öz hakimiyyət maraqlarına uyğun olaraq dəyişmək istəyir. Əgər bu referendum baş tutarsa ölkədə hökm sürən avtoritar rejim daha dəhşətli, sərt, qəddar diktarura rejimi ilə əvəz ediləcək.

Heç kəs referenduma getməsin. Bu referendum boykot edilməlidir. Unutmayın ki, demokratiyanın təntənəsi, qanunların aliliyinin təmin edilməsi və ən başlıcası Azərbaycan dövlətinin ərazi bütövlüyünün bərpası mövcud iqtidarın istefasından keçir. Qalxın ayağa, haqqınızı tələb edin. Hüquqlarınızın tapdanmasına yol verməyin. Qurtuluşumuz milliyətçilikdən keçir”, - bəyanatda vurğulanıb.