Bu referendum neoimperiya siyasətinin nəticəsidir

Dünya Azərbaycanlıları Konqresi (DAK) Krımdakı hadisələrlə bağlı bəyanat yayıb.

Rusiyanın təhrikilə bu il martın 16-da Krımda keçirilən referendum Krımda yaşayan ukraynalılar, Krım türkləri və elə rusdilli əhali üçün “narahatlıq” kimi dəyərləndirilir. Bu referendum aktı Krımda yaşayan xalqlar arasına “nifaq” salmaq təxribatı hesab edilir. Neçə 10 illər boyu bir yerdə problemsiz yaşayan bu xalqların üz-üzə qoyulmasına səbəb kimi Kremlin neoimperiyaçı siyasəti göstərilir.

Rusiyanın Krımda işğal siyasəti davam etdikcə, referendumda iştirak etməyən Krım türklərinin durumunun daha vahiməli olduğu yada salınır. Bu xalqın tarixi vətənindən üçüncü dəfə didərgin düşməsi kimi fəlakətlə üz-üzə qaldığı bəyan edilir.    

Krımda baş verən hadisələr Kremlin Gürcüstan, Moldova və Azərbaycanda yaratdığı münaqişə silsiləsində yeni bir həlqə adlandırılır. Kremlin “rusdilli əhalinin təhlükəsizliyini qorumaq” siyasətinin artıq müstəqil dövlətlərə “təcavüz aləti”nə döndüyü qeyd edilir. “Bu üsulla Rusiya istənilən müstəqil dövlətə təcavüz edərək bu təcavüzə haqq qazandıra bilər”, - deyə müəlliflər nəzərə çatdırırlar.

Dünya birliyinə müraciət edən müəlliflər keçmiş postsovet məkanındakı müstəqil dövlətləri Rusiyanın təcavüzündən qorumaq üçün etibarlı müdafiə sistemi qurmağa çağırırlar. -05D-