Con Kerri demokratik jurnalistləri təbrik edib və dəstək vəd edib

Mayın 3-də qeyd olunan Azad Mətbuat Günü ilə əlaqədar ABŞ dövlət katibi Con Kerri bəyanat yayıb.

“Səmərəli idarəetmə və cəmiyyətin fəaliyyəti üçün azad mətbuat vacibdir. Bu prosesə jurnalistlərin töhfəsini qeyd etmək çox əhəmiyyətlidir. Jurnalistləri Müdafiə Komitəsi qeyd edib ki, son illər “ən yeni tarixdə mətbuat üçün ən məhvedici və təhlükəli dövr olub””, deyə bəyanatda qeyd edilir.

Avtoritar rejimlər, zalım liderlər və senzura azad informasiya axınını məhdudlaşdırmağa və nəzarət altına almağa yönəlib. Senzura diktatorlara həqiqəti gizlətmək və öz maraqlarına uyğun yalanları yaymağa imkan verir.

Jurnalistlər təkcə döyüş zonalarında və avtoritar rejimlərdə təzyiq altında deyil.

Parisdə jurnalistlər və karikaturaçılar azad ifadə hüquqlarını həyata keçirdiklərinə görə qətl ediliblər. Çində jurnalistlər senzura və qanunsuz həbslərdən əziyyət çəkməkdə davam edir. Rusiyada hökumət KİV üzərində nəzarəti gücləndirib və blogerləri təqib edir.

Çində Qao Yu – dövlət sirrinin yayılması ittihamı ilə 7 il müddətinə azadlıqdan məhrum edilmiş 71 yaşlı jurnalist həbsdədir; Suriyada Əsəd rejiminin cinayətlərini ifşa etməyə çalışan Mazen Dərviş barmaqlıqlar arxasındadır; Ta Fonq Tan Vyetnamda hökumətin korrupsiyasını ifşa etdiyinə görə 10 illik həbs cəzası çəkir; və Reyot Alema Efiopiyada hökuməti tənqid etdiyinə görə mühakimə edilib.

ABŞ dərhal bu şəxsləri və peşə fəaliyyətlərinə görə həbsdə olan bütün digər jurnalistləri azad etməyə çağırır.

“Jurnalistləri ədalətsiz olaraq həbs etdikdə və saxladıqda danışmağa davam edəcəyik; bu məsələləri həmin ölkələrin hakimiyyətləri qarşısında qaldırmağa davam edəcəyik; bundan sonra da jurnalistlərin təhlükəsizliyi üçün şərait yaradacağıq”, deyə bəyanatda qeyd edilib. -025D-