Dağıstan hakimiyyəti sərhədi keçən Azərbaycan vətəndaşlarının sayını artırmağı təklif edib

Bakı/16.06.20/Turan: Dağıstan hakimiyyəti Azərbaycan nümayəndələri ilə görüşdə respublikanın Dərbənd rayonunda müvəqqəti düşərgədə olan Azərbaycan vətəndaşlarının birdəfəlik sərhədi keçmə sayını 360 nəfərə qədər artırmağı təklif edib. Yekun qərar bir həftə ərzində qəbul ediləcək, bu barədə çərşənbə axşamı TASS-a Dağıstanın Dərbənd rayonunun başçısı Fuad Şıxıyev bildirib.

"Bu gün Dağıstan Respublikasının prezidenti Vladimir Vasilyev Azərbaycanın nümayəndə heyəti ilə görüşüb. Sayın artırılması ilə bağlı məsələ müzakirə olunub. Hər iki həftədə bir düşərgədə olan 360 nəfərin aparılması mexanizmi təklif edilib. Məsələ ondadır ki, Azərbaycan tərəfi hər dəfə 120-130 nəfər aparır. 120 nəfər gedir, amma 200 nəfər buraya gəlir. Buna görə axın heç vaxt dayanmır", deyən Şıxıyev əlavə edib ki, bu məsələ ilə bağlı yekun qərar həftənin sonuna qədər qəbul edilməlidir.

Azərbaycan nümayəndələrinin sözlərinə görə, siyahılar tərtib olunarkən uşaqlara, qadınlara, yaşlılara, həmçinin xroniki xəstəliyi olanlara üstünlük verilir. "Məhz bu insanlar siyahıya salınır. Üç aydır insanlar buradadırlar, artıq daim burada qalmaları ilə barışa bilmirlər", deyə Şıxıyev bildirib.

Çərşənbə axşamı axşam saatlarında TASS-ın verdiyi məlumata görə, 155 Azərbaycan vətəndaşı sərhədə aparılıb və onlar sərhədi keçməyə başlayıblar. -02D-