DAK İranı Azərbaycana qeyri-səmimilikdə ittiham edir

Dünya Azərbaycanlıları Konqresi (DAK) İranın Azərbaycan səfirliyinin DAK və DAK həmsədri Sabir Rüstəmxanlını separatizmdə ittiham edən bəyanatına cavab yayıb.

İranın Azərbaycan səfirliyi DAK-ın dekabrın 5-də keçirdiyi  “Azərbaycanın Quzeyi və Güneyi arasında əlaqələr: mövcud durum, perspektivlər və vəzifələr” mövzusunda konfransında hiddətlənib. 

İran səfirliyi DAK-ı və DAK həmsədri S.Rüstəmxanlını “separatçı”, “Cənubi və Şimali Azərbaycan” ifadələrini “saxta və  tarixi əsası olmayan termin” adlandırır. 

Cavab bəyanatında müəlliflər İran tərəfin DAK təmsilçilərini “separatçı” adlandırmasını diplomata yaraşmasa da, İran diplomatiyasının mahiyyətini ortaya qoyması sayırlar. Adı çəkilən konfransda İranda insan haqları və azadlıqlarının müzakirə olunduğu deyilir. İranda yaşayan 35 milyon Güney Azərbaycan türkünün ən elementar insani hüquqlardan belə məhrum edildiyi bir daha vurğulanır. Müəlliflər İran tərəfə 1813-cü il Gülüstan, 1828-ci il Türkmənçay müqavilələrilə Azərbaycanı iki yerə parçaladığını xatırladırlar. İran tərəfə 1946-cı ildə Cənubi Azərbaycan dövlətini qan içində boğmasını yadına salırlar. Azərbaycanın tarixi torpaqlarının Quzey və Güney olmaqla iki yerə bölünməsinin dünya dövlətləri parlamentlərində, BMT-də də müzakirə olunduğu vurğulanır. İranın Azərbaycan səfirliyinin bu acı tarixi görməməzliyə vurması həqiqətləri aradan qaldırmır. İran tərəfin ölkəni etnik azlıq problemilə hədələməsinə cavab olaraq Azərbaycanda heç 

bir xalqın milli, dini, ifadə azadlığı problemi olmaması qarşılığı verilir.  

Səfirliyin “Azərbaycanda müxtəlif etniklər arasında birliyin pozulması” haqda danışması rəsmi Tehranın Azərbaycan əleyhinə yürütdüyü siyasətin diplomatik izahı və Azərbaycanı təhdid sayılır. Bu hədə bəyanatı həm də İran xüsusi xidmət orqanlarının Azərbaycanda süni etnik separatizm yaratmaq cəhdi adlandırılır, buna nail ola bilməyəcəyi ifadə edilir. 

İranın Azərbaycanla “şiə qardaşı” olmasına isə bəyanatda “şiə İraının” Azərbaycana düşmən Ermənistana sıx iqtisadi, hərbi dəstək verməsi xatırladılaraq, rəsmi Tehran qeyri-səmimilikdə ittiham edilir. Araz çayı üzərində elektrik stansiyası tikərək, onu Ermənistana bağışlamaq istəməsi İranın təcavüzkarı dəstəkləməsi hesab edilir. “Ermənistan rəhbərliyini “dost və qardaş” kimi bağrına basan İran “şiə qardaşlığından” hansı haqla danışır?”, - deyə bəyanatda bu saxtakarlığa etiraz ifadə edilir.

Müəlliflər İran tərəfin bəyanatını diplomatik missiyasını aşan sənəd sayır, bunu insan haqlarına qarşı olmasının, terrorçu və separatçı rejimlərə dəstək verməsinin təsdiqi adlandırır. -05D-