ATƏT XİN Şurasında Azərbaycan və Ermənistan əlavə çıxış hüququndan istifadə ediblər

Azərbaycan nümayəndəsi Ermənistan XİN rəhbəri Edvard Nalbandyanın dekabrın 7-də Dublində ATƏT XİN Şurasının iclasındakı çıxışına, xüsusən onun Dağlıq Qarabağ nizamlanması ilə bağlı ifadələrinə reaksiya verib. Bütün ölkələrin çıxışları başa çatdıqdan sonra Azərbaycan nümayəndə heyətin Ermənistan XİN rəhbərinin çıxışına cavab vermək hüququndan istifadə edib.

Azərbaycanın ATƏT-dəki nümayəndəsi, səfir Qalib İsravilov deyib: “Təəssüf ki, ATƏT növbəti dəfə Ermənistanın Azərbaycana yönəlmiş ittihamlarının şahidi oldu. Təəssüf ki, E.Nalbandyan öz çıxışında Azərbaycanı ittiham edib, amma onun çıxışında Ermənistanın münaqişənin həlli üçün hansı addımları atdığı, Azərbaycan ərazilərinin işğalı nəticəsində yaranmış mürəkkəb vəziyyəti necə aradan qaldırmağa çalışdığı barədə çox az fikir səslənib”. 

Səfir qeyd edib ki, “XİN rəhbərinin bəyanatında yeganə maraqlı element Ermənistanın münaqişənin həlli üzrə həmsədrlərin mövqeyini paylaşması faktı olub”. “Bu iddia həqiqətdirsə, ATƏT MQ həmsədrlərinin Ermənistanın qarşısına daim irəli sürdüyü əsas tələbi Azərbaycanın işğal edilmiş ərazilərindən qoşunların çıxarılmasıdır. Ermənistan bu tələbi yerinə yetirsə, Ermənistan nazirinin Azərbaycana qarşı yönəlmiş bütün iddiaları da aradan qaldırılacaq”, deyə İsrafilov bildirib.

Səfir qeyd edib ki, Ermənistan buna nə qədər tez riayət edərsə, qarşılıqlı anlayış və sülh yolunda əməkdaşlıq da o qədər tez əldə olunar.

Öz növbəsində, Ermənistan nümayəndəsi də iclasda cavab hüququndan istifadə edərək, Azərbaycanın əlavə çıxışının “yalnız Azərbaycanın Ermənistana qarşı yönəlmiş ittihamlarının təkrarı idi, nümayəndə heyəti eyni ideyaları ikinci dəfə irəli sürmək üçün hüququnu tələb edib”. -04C-