Deputaların, hakimlərin maaşları artdı

Bakı/14.05.18/Turan: Azərbaycanda Milli Məclisin sədrinin, Konstitusiya Məhkəməsinin və Ali Məhkəmənin sədrinin maaşları artırlıb. Bununla yanaşı Milli Məclisin sədrinin müavinlərinin, deputatların, bütün məhkəmə hakimlərinin maaşları da yüksəldilib.

Prezident İlham Əliyev mayın 12-də bununla bağlı bir neçə sərəncam verib və qanunlara dəyişiklikləri imzalayıb. Maaşlara edilmiş artımlar mayın 1-dən hesablanacaq.

Ölkə başçısı "Məhkəmələr və hakimlər haqqında" qanunun 106-cı maddəsinə dəyişikliklər edib. Həmin maddə "Hakimlərin maddi təminatı" adlanır. Dəyişikliyə əsasən, Ali Məhkəmənin sədrinin maaşı 2070 manatdan 2280 manatadək artırılıb.

Qanunun 106-cı maddəsinə görə, Naxçıvan Ali Məhkəməsinin və apellyasiya məhkəmələrinin sədrləri ali məhkəmə sədrinin vəzifə maaşının 90 faizi, ağır cinayətlər məhkəmələrinin, hərbi məhkəmələrin və inzibati-iqtisadi məhkəmələrin sədrləri Ali Məhkəmə sədrinin vəzifə maaşının 80 faizi həcmində əmək haqqı alır. Digər məhkəmələrin sədrlərinə Ali məhkəmə sədrinin vəzifə maaşının 70 faizi, bütün məhkəmələrin sədr müavinlərinə müvafiq məhkəmə sədrinin vəzifə maaşlarının 90 faizi həcmində maaş nəzərdə tutulur. Qanun Ali Məhkəmənin, Naxçıvan Ali Məhkəməsinin və apellyasiya məhkəmələrinin kollegiya sədrlərinə müvafiq məhkəmə sədrinin vəzifə maaşının 85, bütün məhkəmələrin hakimlərinə müvafiq məhkəmə sədrinin vəzifə maaşlarının 80 faizi həcmində maaş müəyyən edir.

Ali Məhkəmənin sədrinin maaşı artdığından müvafiq olaraq, digər hakimlərin maaşları da artacaq.

Ölkə başçısının dəyişiklik etdiyi digər qanun "Konstitusiya Məhkəməsi haqqında" qanundur. Həmin qanunun "Konstitusiya Məhkəməsi hakiminin əmək haqqı" adlanan 71-ci maddəsinə dəyişiklik medilib. Dəyişikliyə əsasən, həmin məhkəmənin sədrinin aylıq vəzifə maaşı 2120 manatdan 2335 manata qaldırılıb.

Həmin qanuna görə, KM sədrinin müavininin aylıq vəzifə maaşı sədrin aylıq vəzifə maaşının 90, KM-nin hakiminin aylıq vəzifə maaşı isə sədrin aylıq vəzifə maaşının 85 faizinə bərabərdir. Müvafiq olaraq onların da maaşı artıb.

Ölkə başçısı həmçinin deputatların maaşlarının artımını da təsdiq edib. Bununla bağlı "Azərbaycan Respublikası Milli Məclisi deputatının statusu haqqında" qanunun "Deputatın maddi təminatı" adlanan 21-ci maddəsinə dəyişiklik edilib.

Dəyişiklik Milli Məclisin (MM) sədrinin 2250 manat miqdarında olna aylıq vəzifə maaşının 2475 manata artırılmasını nəzərdə tutur.

MM sədrinin birinci müavini sədrin aylıq vəzifə maaşının 90, müavin isə 85 faizi həcmində maaş alır. Komitə və komissiya sədrlərinin, onların müavinlərinin maaşı da müvafiq olaraq 80 və 75 faizlə hesablanır. Deputatlarsa, sədrin maaşının 70 faizi miqdarında aylıq vəzifə maaşı alırlar.

Onların maaşı da artmış olub.

Ölkə başçısı qanunlara edilmiş dəyişikliklərin tətbiqi ilə bağlı sərəncamlar da verib.--0--