Deputatlığa namizəd Gədəbəy rayonunda məmurların seçkilərə müdaxilə etdiyini bildirib

Bakı/30.01.20/Turan:  104 saylı Gədəbəy-Tovuz seçki dairəsindən deputatlığa namizəd, sahibkar Nazim Bəydəmirli Gədəbəy Rayon İcra Hakimiyyətinin seçki prosesinə müdaxilə etdiyini bildirib. Bu barədə Turan-a N.Bəydəmirli özü məlumat verib.

Onun sözlərinə görə, bu gün Şahdağ kəndində seçicilərlə görüş zamanı İcra Hakimiyyətinin kənd üzrə nümayəndəsi sakinlərdən birinə telefon edərək hamının  dağılışmasını tələb edib.

Sonradan kənd administrasiyası nümayəndəsinin müavini gəlib və o da seçicilərin dağılışmasını tələb edib. Lakin seçicilər onun tələbini yerinə yetirməkdən imtina ediblər və etiraz nəticəsində məmur geri çəkilib.

N.Bəydəmirli qeyd edib ki, Gədəbəy rayonunda digər görüşlərdə də oxşar müdaxilə ilə qarşılaşıb.

Eyni zamanda Tovuz rayonunda hələlik heç bir müdaxilə yoxdur.

Onun sözlərinə görə, dairədə pozuntular ilə bağlı toplanmış bütün materiallar MSK və beynəlxalq müşahidəçilərə təqdim olunacaq.

Nazim Bəydəmirli 3-cü çağırış Milli Məclisin deputatı olub.

O, iqtisadi problemlərlə bağlı aktual ekspert rəyləri ilə tanınır. -06D-