DİN-in mətbuat xidməti İsmayılovun döyüldüyünü inkar edir, amma nazir müavini üzr istəyir

DİN-in mətbuat xidməti vəkil Aslan İsmayılovun mayın 30-da DİN-in Mütəşəkkil Cinayətkarlığa qarşı Mübarizə Baş İdarəsində (MCMBİ) döyüldüyü haqqında bəyanatını təkzib edib.

DİN-in mətbuat xidmətinin işçisi Orxan Mənsurzadə Turan-a bildirib ki, İsmayılovun dedikləri həqiqətə uyğun deyil.

Onun sözlərinə görə, İsmayılov MCMBİ-yə dəvət edilib və “uydurma, böhtan məlumatların yayılmasının yolverilməz olduğu” diqqətinə çatdırılıb. 

Mənsurzadə İsmayılovun bəyanatını “avantüra və polulizm” adlandırıb.

Bu arada, İsmayılov özü bugünki mətbuat konfransında ona qarşı fiziki təzyiq faktını təsdiq edərək, bunu bütün cəmiyyətin etirazını bildirməli olduğu özbaşınalıq adlandırıb.

İsmayılov deyib ki, ona bloger Ağaddin Rəşada qarşı işgəncə faktını açıqladığı üçün təzyiq göstərilir.

Vəkil onu vuran və təhqir edən MCMBİ müstəntiqi Daanov cəzalandırılana qədər mübarizəni davam etdirəcəyini bildirib.

Hüquq müdafiəçiləri Arzu Abdullayeva və Eldar Zeynalov İsmayılovu dəstəkləyiblər.

Mətbuat konfransından sonra İsmayılov DİN-ə gedib, burada onu baş nazirin birinci müavini Vilayət Eyvazov qəbul edib.

“O, bu hadisəyə görə dəfələrlə üzr istəyib və hərtərəfli araşdırma aparılacağını və mənim bir daha dəvət ediləcəyimi bildirib. Daanova qarşı cinayət işi açıldıqdan və o, məsuliyyətə cəlb edildikdən sonra bu üzrxahlıqların səmimiliyinə inanacağam”, deyə İsmayılov bildirib. -06D-