DİN Kollegiyası: Cinayətlərin sayı azalır

İyunun 31-də DİN-in yarım ilin yekunlarına həsr olunmuş kollegiyası keçirilib. Hesabat məruzəsi ilə çıxış edən nazir müavini Vilayət Eyvazov ölkədə “kriminal fəallığın” azaldığını bildirib.

Hesabat dövründə qeydə alınmış cinayətlərin sayı 10048 təşkil edib ki, bu da ötən ildəki səviyyədən 11,4% azdır.

Onların strukturunda şəxsiyyət əleyhinə olanlar 48,3 faiz, soyğunçuluqlar 24,8 faiz, habelə mütəşəkkil dəstələr tərəfindən törədilən cinayətlər 2,9 dəfə, əvvəllər cinayət törətmiş şəxslərin təkrar cinayətləri 16,7 faiz, qrup halında cinayətlər 13,5 faiz, odlu silahın tətbiqilə törədilənlər 5,4 faiz, məişət zəminində baş vermiş cinayətlər 2,1 dəfə azalıb. Bütövlükdə respublikanın 22 şəhər və rayonunda ağır və xüsusilə ağır cinayətlərin sayında nəzərəçarpan azalma müşahidə edilib. 

Ötən ilin 6 ayı ilə müqayisədə cinayətlərin açılması yaxşılaşaraq 87,4 faiz təşkil edib, açılmış cinayətlərin sayı 14,4 faiz və ya 1379 fakt çox olub. Cinayətkar qrup və dəstələrin fəaliyyətinin qarşısının alınması istiqamətində həyata keçirilən tədbirlərlə 1039 nəfərdən ibarət 361 cinayətkar qrup və 10 mütəşəkkil dəstə zərərsizləşdirilib, onların törətdiyi 1130, o cümlədən 320 ağır və xüsusilə ağır cinayət açılıb. 

Qeyri-leqal dövriyyədən ümumi məbləği 83 min manat təşkil edən 1041 ədəd müxtəlif nominalda milli əskinas, həmçinin 300 tona yaxın saxta yeyinti məhsulu və tikinti materialı çıxarılıb.

Qanunsuz dövriyyədən  350 kq, müqayisə edilən dövrə nisbətdə isə 33 kq çox narkotik vasitə çıxarılıb, 73 nəfərdən ibarət 28 cinayətkar qrup zərərsizləşdirilib. Bununla bərabər, 33,5 kq narkotikin qaçaqmalçılıq yolu ilə ölkəyə gətirilməsinin qarşısı alınıb, ümumi çəkisi 177,6 ton olan narkotik tərkibli bitki yaşıl kütlə halında məhv edilib.

66 traffikinq faktı aşkarlanıb, 5 nəfərdən ibarət 2 cinayətkar qrup zərərsizləşdirilib. Bu hüquqazidd əməllərin qurbanı olan 20 şəxs müəyyənləşdirilərək cəmiyyətə reinteqrasiyası təmin edilib.

Yol hərəkəti təhlükəsizliyinin pozulması hallarının 3 dəfə artması qeydə alınıb.

Hadisələrin 33,3 faizi sürət həddinin aşılması, 32,3 faizi qarşıdan gələn nəqliyyatın hərəkət zolağına çıxma və ötmə, 9,5 faizi yolayrıcılarının keçilməsi qaydalarının pozulması, 3,1 faizi nəqliyyat vasitəsinin sərxoş halda idarə olunması nəticəsində baş verib.

Qeyd edilib ki, prezident seçkiləri ilində vətəndaşlara şəxsiyyət vəsiqələrinin verilməsi xüsusi əhəmiyyət kəsb edir.

Hesabatda həmçinin bildirilib ki, Daxili Qoşunlar ictimai asayişin keşiyində durur və qarşılarına qoyulmuş vəzifələri məsuliyyətlə yerinə yetirir.

Son nitqlə çıxış edən DİN rəhbəri Ramil Usubov qeyd edib ki, polisin işi ümumilikdə qənaətbəxşdir. O, DİN orqanlarını bundan sonra da ali baş komandanın göstərişlərinə və əməllərinə riayət etməyə çağırıb. -02D-