XİN öz əməkdaşının öldüyünü təsdiqləyib (YENİLƏNİB)

İyulun 31-də axşam Azərbaycan XİN mətbuat xidməti nazirliyin əməkdaşı Tural Qurbanovun iyulun 25-də Maldivdə öldüyünü təsdiqləyib.

Ölümə ürək çatışmazlığı səbəb olub. Bu barədə Turan-a mətbuat xidmətinin nümayəndəsi bildirib. Mənbəyə görə, T.Qurbanov istirahətdə olub.

Qeyd edək ki, iyulun 31-də səhər nə XİN, nə də T.Qurbanovun ikinci katib vəzifəsində çalışdığı Almaniya səfirliyi diplomatın ölüm faktını şərh etməmişdi.  T.Qurbanov 27 yaşında olub. -03B-

2013 İyul 31 (Çərşənbə) 13:45:19

Azərbaycanın Almaniyadakı səfirliyinin işçisi Tural Qurbanov iyulun 25-də Maldiv adalarındakı otellərdən birində ölüb. Bu barədə tanınmış bloger Emin Milli özünün Facebook səhifəsində yazıb. Onun bildirdiyinə görə, T.Qurbanov əslində xüsusi xidmətin əməkdaşı olub, siyasi mühacir və tanınmış bloger Həbib Müntəziri öldürmək tapşırığı alıb. H.Müntəzir uzun müddət Almaniyada yaşayıb, Azərbaycanda hakim rejimi fəal ifşa edib. 

Emin Millinin söylədiklərinə görə, T.Qurbanov Müntəziri öldürməkdən imtina edib və buna görə öz şefləri tərəfindən aradan götürülüb. 

Diplomatın ölümü ilə bağlı Turan-ın Azərbaycan XİN mətbuat xidmətinə sorğusuna cavab almaq mümkün olmayıb. Mətbuat xidmətindən ölüm faktının olub-olmadığını araşdırmağı vəd ediblər. 

Azərbaycanın Almaniyadakı səfirliyində Tural Qurbanovla calaşdırmaq xahişinə isə uzun pauzadan sonra cavab olaraq 2-3 saatdan sonra zəng edib mətbuat katibi ilə danışmağı məsləhət görüblər. T.Qurbanovun ölüm xəbərinin olub-olmaması haqda suala telefondakı qız səs tonunu dəyişmədən “xeyr, bilmirəm. Hazırda səfirliyin işçilərinin 30%-i məzuniyyətdədir”.

Bu arada XİN-in saytında Azərbaycanın Almaniyadakı səfirliyinin işçilərinin siyahısında Tural Qurbanov adında ikinci katib (27 yaşında) var.

Milli Təhlükəsizlik Nazirliyinin mətbuat xidmətindən hər zamankı kimi mətbuatda gedən yazını təkzib edərək cəfəngiyyat olduğunu bildiriblər. “Bizdə Tural Qurbanov adında əməkdaş olmayıb”, - mətbuat xidmətinin işçisi cavab verib.

Maldiv KİV-i bildirib ki, Azərbaycan vətəndaşının cəsədi səhər saat 10:20-də  Kurumba Resort otelinin nömrələrindən birində aşkar edilib. Ölümün səbəbləri məlum deyil. Araşdırma aparılır.

Maldiv polisinin nümayəndəsi ölüm faktını Turan agentliyinə təsdiqləyib. Cəsədin üzərində Azərbaycan vətəndaşı Tural Qurbanova məxsus sənədlər olub.

Polis ölümün səbəbləri, motivləri, hadisə yerində digər şəxslərin iştirakı barədə açıqlama verməyib. Yerli mənbələrdən biri bildirib ki, istintaq bir neçə versiyanın üzərində işləyir. Bunların arasında qətl və intihar da var.

Məlumat dərc olunana qədər Azərbaycanın rəsmi mənbələri bu adda və bu vəzifədə ölkə vətəndaşının ölüm xəbərini nə təsdiq və də təkzib ediblər. -03V-