Dindarların işi üzrə məhkəmə başqa vaxta keçirilib

Noyabrın 7-də azadxeber.org saytının redaktoru Nicat Əliyevin və digər 9 dindarın işi üzrə təyin edilmiş növbəti məhkəmə iclası noyabrın 13-nə keçirilib. Prosesdə vəkillər yekun sözlə çıxış etməliydilər. Lakin onların bir çoxu hazırlaşa bilmədiyindən dinləmələr başqa vaxta keçirilib.

Xatırladaq ki, N.Əliyev CM-in  234.1. (qanunsuz narkotik maddənin saxlanması), 167-2.2.1 (bir qrup şəxs tərəfindən dini ədəbiyyatın yayılması), 281.2 (hakimiyyətin zorla zəbt edilməsinə və konstitusiya quruluşunun dəyişdirilməsinə açıq çağırışlar) və 283.2.2 (milli, irqi və dini ədavətin qızışdırılması) maddələri ilə ittiham olunur. 

N.Əliyev və daha 9 dindar 2012-ci ilin mayında “Eurovision” mahnı müsabiqəsi ərəfəsində cinayət məsuliyyətinə cəlb olunublar. Onlar Azərbaycan hakimiyyətinin siyasətini tənqid edən vərəqələrin və videodisklərin yayılmasında ittiham olunurlar.

Müttəhimlər irəli sürülən ittihamları rədd ediblər və bildiriblər ki, polisdə onlara işgəncə verilib.

Jurnalist təşkilatları hesab edirlər ki, N.Əliyev ifadə azadlılğına görə təqib olunur.06S-