Dövlət sirrinin açıqlanmasına görə məsuliyyət sərtləşdirilir

Parlamentin bugünkü iclasının gündəliyinə Cinayət Məcəlləsinə dövlət sirrinin açıqlanmasına görə məsuliyyəti sərtləşdirən düzəlişin edilməsi məsələsi salınıb.

Qanun layihəsinə görə, bundan sonra şəxs tərəfindən ona etibar edilmiş və ya xidməti vəzifəsinə və yaxud işinə görə ona məlum olan dövlət sirrini təşkil edən məlumatların yayılması, dövlətə xəyanət əlamətləri olmadıqda 3 ildən 6 ilədək müddətə müəyyən azadlıqdan məhrum etmə ilə cəzalandırılacaq. Öncə bu müddət 2 ildən 5-ilədək idi.

Eyni əməllər ağır nəticələrə səbəb olduqda 4 ildən 8 ilədək müddətə azadlıqdan məhrumetmə (284.2-ci maddə) ilə cəzalandırılacaq. Bundan öncə bu maddə 3 ildən 7 ilədək azadlıqdan məhrumetməni nəzərdə tuturdu.

Bundan əlavə, CM-ə yeni maddə əlavə edilib: 284-1. Bu maddəyə görə, dövlət sirrini təşkil edən məlumatların güc və ya güc tətbiqi barədə hədə və başqa məcburi yolla, yalan, soyğunçuluq, texniki vasitələrin köməyi ilə qanunsuz olaraq əldə edilməsi 2 ildən 5 ilədək həbs cəzası nəzərdə tutur.—06D-