Dövlət Təhlükəsizliyi Xidməti Azərbaycanda xarici bioloji laboratoriyaların mövcudluğunu təkzib edir

Bakı/07.05.22/Turan: "Son zamanlar Azərbaycanda guya üçüncü ölkələrin maliyyə dəstəyi ilə bioloji silahlar üzrə elmi tədqiqatlar aparan mərkəzlərin fəaliyyət göstərməsi barədə bir neçə dəfə, o cümlədən beynəlxalq tədbirlər çərçivəsində Rusiya Federasiyasının təmsilçiləri tərəfindən müəyyən fikirlər səsləndirilib. Heç bir fakt göstərilmədən irəli sürülmüş bu mülahizələr respublikamızın ictimaiyyəti tərəfindən müəyyən narahatçılıqla qarşılanması müşahidə edilməkdədir". Bu barədə Azərbaycan Dövlət Təhlükəsizliyi Xidmətinin 7 may tarixli bəyanatında deyilir.

"Azərbaycanda belə elmi mərkəzlər heç vaxt fəaliyyət göstərməmiş, ölkə əhalisinin və ya qonşu dövlətlərin vətəndaşlarının sağlamlığına zərər vura biləcək hər hansı tədqiqatlar aparılmamışdır. Bu qəbildən olan məlumatların Azərbaycan tərəfinin mövqeyi öyrənilmədən beynəlxalq tədbirlərdə, o cümlədən BMT kimi mötəbər təşkilatda bəyan edilməsi təəssüf doğurur", deyə bəyanatda qeyd edilir. 

Azərbaycan DTX müqabil tərəfdən qaldırılan məsələ ilə bağlı konkret faktlar təqdim edildiyi halda onların araşdırılmasına hazır olduğunu bildirir.

Eyni zamanda, sənəddə bu iddiaların nə vaxt və harada səsləndirildiyinə dəqiqlik gətirilmir. 02D