DQMŞ-nin yeni namizədi avqustun 26-da irəli sürülə bilər

Milli Şuraya daxil olan 6 partiya liderinin bugünki görüşündə avqustun 26-da növbəti sessiya keçirmək və prezident seçkilərində iştirak üçün DQMŞ-dən ehtiyat namizədi seçmək qərarı qəbul edilib.

Elə həmin gün bu namizədin rəsmi irəli sürülməsi üzrə təşəbbüs qrupunun iclası keçiriləcək. Bu barədə Müsavat Partiyasının lideri İsa Qəmbər, AXCP sədri Əli Kərimli, AKXCP rəhbəri Mirmahmud Mirəlioğlu, Açıq Cəmiyyət Partiyasının sədri Sülhəddin əkbər, ALP rəhbəri Əvəz Temirxan və El Hərəkatının lideri Eldar Namazovun iştirak etdiyi görüşün yekunlarına həsr olunmuş brifinqdə bildirilib.

Namazov bildirib ki, MŞ-yə İbrahimbəyovun RF qarşısında öhdəlikləri olmadığı haqqında arayış daxil olub. O, bunu seçicilərin təşəbbüs qrupu adından İbrahimbəyovun sənədlərinin MSK-ya təqdim edilməsi və seçicilərin imzalarının toplanmasına başlanması üçün yetərli hesab edir.

Qeyd edək ki, İbrahimbəyovun namizəd olaraq qeydiyyatı üçün onun Rusiya vətəndaşlığından çıxarılması zəruri idi. MŞ imza vərəqələrinin təhvil verilməsi mərhələsi başa çatana qədər bu məsələnin həll olunacağına ümid edir.

Avqustun 26-da MŞ yeni namizəd irəli sürərsə, onun MSK-da təsdiqi məsələsi 5 gün ərzində həll olunacaq. Mənfi cavab alınarsa və apellyasiya verilərsə, ona baxılması üçün daha üç gün lazımdır. İmza vərəqələrinin son qəbul tarixi 9 sentyabr saat 18.00-dir. 60 dairədən 40 min imza təqdim edilməlidir. Bunun üçün MŞ-nin həddindən artıq az – 5-10 gün vaxtı qalır.

Odur ki, MŞ-də qeyri-müəyyənlik və qətiyyətsizlik və qərar qəbulunda lənglik müxalifətə baha başa gələ bilər və onu seçkilərdə iştirak imkanından məhrum edə bilər. -06D-