DTX Ukrayna pasrpotları satan cinayətkar qrupu ifşa edib

Azərbaycan Dövlət Təhlükəsizliyi Xidməti qanunsuz yolla Ukrayna pasportları hazırlayıb pul vəsaiti müqabilində satan transmilli cinayətkar qrupun üzvlərinin saxlanıldığı haqqında məlumat yayıb.

Aparılan araşdırmalar zamanı Ukraynanın Lvov şəhərində yaşamış Nuriyev İbadət Qəhrəman oğlu, İstanbulda yaşamış Bağırov Fərid Vaqif oğlu və digərlərinin qabaqcadan əlbir olan bir qrup şəxs halında 2023-cü ilin yanvar ayından etibarən ayrı-ayrı şəxslər üçün Ukraynaya məxsus pasport, şəxsiyyət və sürücülük vəsiqələrini, o cümlədən digər sənədləri qeyri-qanuni yolla hazırlayıb, hər birini 30.000 ABŞ dollarınadək müxtəlif məbləğlərdə pul vəsaiti müqabilində satmaları müəyyən edilib.

Adı çəkilən şəxslər saxlanılıb və Azərbaycanda istintaqa cəlb edilmələri təmin olunub, hüquq verən və vəzifədən azad edən vəsiqə və digər rəsmi sənədləri istifadə etmək məqsədilə qanunsuz hazırlama, bu cür saxta sənədləri satma və digər cinayət əməllərinə görə onlara ittiham elan edilib.

Hazırda qeyd olunan və digər əlaqəli cinayətlərlə bağlı intensiv istintaq-əməliyyat tədbirləri həyata keçirilir.