Dublində GUAM ölkələrinin xarici işlər nazirlərinin görüşü keçirilib

Cümə günü Dublində Demokratiya və İqtisadi İnkişaf naminə Təşkilat –GUAM-a üzv ölkələrin XİN Şurasının iclası keçirilib. Dekabrın 6-7-də İrlandiya paytaxtında keçirilən ATƏT XİN Şurası çərçivəsində Azərbaycan, Ukrayna, Gürcüstan və Moldovanın xarici işlər nazirləri müzakirələr aparıblar.

Forumun işində həmçinin GUAM baş katibi Valeri Çeçelaşvili iştirak edib.

Dünən Çeçelaşvili jurnalistlərə bildirib ki, GUAM XİN Şurası çərçivəsindəki görüşdə ölkələrin qarşılıqlı fəaliyyəti və ayrı-ayrı sahələrdə əməkdaşlığı müzakirə olunub. Nazirlər təşkilat çərçivəsində fəaliyyət göstərən bütün işçi qrupları gözdən keçirəcəklər və gələcək əməkdaşlığın istiqamətlərini müəyyən edəcəklər, deyə o bildirib.

Nazirlərin müzakirə etdikləri mövzular arasında BMT çərçivəsində müzakirəyə çıxarılması planlaşdırılan “GUAM məkanında Uzanan münaqişələr və onların beynəlxalq sülh, təhlükəsizlik və inkişaf üçün nəticələri” adlı qətnamə layihəsi də var idi. 2013-cü ildə GUAM sammitinin Bakıda keçirilməsi məsələsi də müzakirələrin gündəliyinə daxil idi.

GUAM 1997-ci ildə Gürcüstan, Ukrayna, Azərbaycan və Moldova tərəfindən yaradılmış regional təşkilatdır (1999-2005-ci illərdə Özbəkistan da təşkilata daxil olub). -04С-