Edvard Nalbandyan ATƏT-in Minsk Qrupu həmsədrlərinin vəkili qismində

Ermənistanın XİN rəhbəri Edvard Nalbandyan dekabrın 7-də Dublində ATƏT XİN Şurasının 19-cu iclasındakı nitqində Azərbaycanın ünvanına ittihamlarla çıxış edib.

“ATƏT Minsk Qrupu həmsədrlərinin regiona onlarca səfəri, təəssüf ki, nəticəsiz qalıb, çünki Azərbaycan tərəfi həmsədrlərin təkliflərini bir-birinin ardınca rədd edib. Biz Azərbaycanın ATƏT mandatı çərçivəsində işi pozmaq cəhdlərini görürük”, deyə Nalbandyan bildirib.

Onun fikrincə, Azərbaycan danışıqlarda maksimalist mövqeyi tutub və hər yolla Minsk Qrupunun işinə mane olur. “Azərbaycan tərəfi hər yolla vasitəçiləri dəyişməyə və onların səylərini ləkələməyə çalışır”, deyə Nalbandyan bildirir.

Macarıstandan ekstradisiya edilmiş Azərbaycanlı zabit Ramil Səfərovun azad edildiyini xatırladan Nalbandyan qeyd edib ki, Azərbaycanda “o, milli qürur rəmzinə çevrilib”.

Nalbandyan qeyd edib ki, “Ermənistan sülh yolu ilə nizamlanma əldə olunmasında həmsədrlərin tərəfindədir”. “Biz həmçinin təəssüf edirik ki, Kazan sammitində irəliləyiş əldə olunmadı”, deyə Nalbandyan bildirib.

Dünən Azərbaycan XİN rəhbəri Elmar Məmmədyarov qeyd edib ki, münaqişənin tənzimlənməsi üçün məhz status-kvonun dəyişdirilməsini və Azərbaycanın işğal edilmiş ərazilərinin azad edilməsini istəməyən Ermənistanın mövqeyi maneədir. 

Xatırladaq ki, bu gün Dublində 57 ATƏT ölkəsinin nümayəndə heyəti rəhbərlərinin və əməkdaşlıq üzrə tərəfdaşların çıxışları davam edəcək. Bütün çıxışlar başa çatdıqdan sonra nazirlər müzakirəyə gedəcəklər və ATƏT XİN Şurası çərçivəsində bir sıra sənədlər qəbul edəcəklər. -04С-