Əfv fərmanı siyasi məhbus probleminin həllinə yox, beynəlxalq tənqidləri yumşaltmağa hesablanıb

Hüquq və Azadlıqların Müdafiəsi İnstitutu (HAMİ) dekabrın 16-da dövlət başçısı İlham Əliyevin imzaladığı əfv fərmanına münasibət ifadə edib. 

Qurum əfv fərmanı ilə günahsız adamların bir qisminin azadlığa çıxmasını təqdir edir, fərmanda 13 siyasi məhbusun adının olması müsbət qarşılanır. “HAMİ hesab edir ki, bu əfv fərmanı da əvvəlkilər kimi AŞPA-nın tənqidlərini yumşaltmağa yönəlib”, -  fərmanın mahiyyətinə toxunulur. 

Açıqlamada 2013-cü ilin yanvarında AŞPA-da Azərbaycanda siyasi məhbus probleminin növbəti dəfə müzakirəyə çıxarılaraq AŞPA-nın siyasi məhbuslar üzrə məruzəçisi Kristofer Ştrasserin hazırladığı Azərbaycanla bağlı sənədin müzakirə olunacağını xatırladılır. Həmin sənəddə 60-dan çox şəxsin adı siyasi məhbus kimi keçir. Son fərmanla isə cəmi 13 nəfər siyasi məhbus əfv edilib. Halbuki, jurnalist Əvəz Zeynallı və Elnur Seyidov xaric qalanlarını əfv etmək olardı. “Siyasi məhbusların hamısını azad etməməklə iqtidar siyasi məhbus probleminin həllində maraqlı olmadığını göstərir, beynəlxalq tənqidləri yumşaltmaq üçün bu addımı atır”, - sənəddə qeyd edilir.  

Sənəddə fərmanla azad edilən siyasi məhbusların çoxunun cəzalarını bitirməyə az qaldıqlarını, bu fərman olmasaydı belə qarşıdakı aylarda azadlığa çıxacaqlarını vurğulayır. Onların bu günə kimi həbsdə saxlanmaları iqtidarın siyasi məhbuslara səmimi olmamasının göstəricisi sayılır.

Son olaraq HAMİ iqtidarı bütün siyasi məhbusları azad etməyə çağırır.-05D-