Əli Gülalıyev: Polislər məni təhqir ediblər (YENİLƏNİB)

Hüquq müdafiəçisi Oqtay Gülalıyevin oğlu Əli Gülalıyev Turan agentliyinə bu gün evlərinə gəlmiş polis əməkdaşlarının keçirdiyi sorğunun detallarını açıqlayıb.

Əvvəlcə evə üç polis daxil olub, onlar 23 sentyabr hadisəsi – Əlinin dörd naməlum şəxs tərəfindən döyülməsi və bıçaq xəsarətləri alması haqqında ətraflı məlumat almaq istədiklərini bildiriblər.

“Onlar təxminən 11.30 radələrində gəliblər, heç bir sənəd təqdim etməyiblər, amma onlar arasında daha əvvəl məndən ifadə alan müstəntiq var idi. Danışıq tonu normal idi və suallar həmin hadisə ilə bağlı idi. Amma onlardan biri hara isə zəng edib atamın evdə olmadığını dedikdən təxminən 15 dəqiqə sonra evə mülki geyimli daha iki nəfər gəldi”, deyə Əli bildirib.

Eyni zamanda Demokratik Qüvvələrin Milli Şurasının prezidentliyə namizədinin seçki qərargahının mətbuat mərkəzinin rəhbəri də olan Oqtay Gülalıyev həmin vaxt Şirvan şəhərinin Apellyasiya Məhkəməsində daşqından ziyan çəkənlərin hüquqlarını müdafiə edirdi.

Zərərçəkmişin sözlərinə görə, bundan sonra polislər onu hədələməyə başlayaraq, Bayram Sultanlı adlı bir şəxsin onu döydüyünü və istintaqı aldatdığını etiraf etməyi tələb ediblər.

“Onlardan biri mənə yumruq göstərib və iki barmağını göstərərək lazımi ifadələri verməsəm gözlərimi oyacağı ilə hədələyib. Atam zəng edib onlardan evi tərk etməyi və himayəçim olmadan dindirmə həyata keçirməməyi tələb edib, lakin onlar kobud şəkildə dindirməni davam etdiriblər”, deyə Əli qeyd edib.

Polis təxminən bir saat evdə olub. “Gedərkən mənə hədələyici tonla bildiriblər ki, şöbəyə çağıracaqlar və zorla ifadə alacaqlar”.

KİV və sosial şəbəkənin fəaliyyəti sayəsində polisin əməlləri ictimaiyyətə dərhal məlum olub. Azərbaycan Milli Helsinki Vətəndaş Assambleyasının sədri Arzu Abdullayeva ABŞ səfiri Riçard Morninqstara baş verənlər barədə məlumat verib.

Hüquq müdafiəçisinin Turan agentliyinə verdiyi məlumata görə, səfirlik Prezident Administrasiyası ilə məsləhətləşmələr aparıb. PA qanunvericilik və hüquqi ekspertiza məsələləri üzrə şöbənin rəisi Şahin Əliyev bu məsələdə polisin qanunu pozmasına yol verilməməsi üzrə tədbirlər görməyi vəd edib. -0- 

2013 Sentyabr 26 (Cümə axşamı) 16:40:20

Oqtay Gülalıyevin evinə soxulmuş polis əməkdaşları onun oğlu Əlidən ona hücumla heç bir əlaqəsi olmayan başqa insana qarşı ifadə verməyi tələb edirlər. Bu barədə Turan-a Gülalıyev özü bildirib.

Polis əməkdaşları gəncin valideynlərinin olmamasından istifadə edərək evə soxulublar və təzyiq göstərərk, ondan ifadə almağa çalışıblar.

Lakin 16 yaşlı Əli sentyabrın 23-də ona hücum edənlərin arasında olmayan insana qarşı ifadə verməkdən imtina edir.

O.Gülalıyev bildirib ki, polislər oğlunu vurublar və təhqir ediblər. Onlar mənzili tərk etmirlər, evdə olan Əlinin nənəsi və balaca qardaşı isə çox qorxublar.

DİN-in mətbuat xidməti Turan agentliyinin baş verənlərin səbəbləri ilə bağlı sorğusuna cavabda vəziyyətin “araşdırıldığını” bildiriblər. -06D-

2013 Sentyabr 26 (Cümə axşamı) 14:37:54

Bu gün günorta 10-a yaxın polis əməkdaşı vətəndaş cəmiyyəti fəalı Oqtay Gülalıyevin evinə gələrək, onun oğlu Əliyə amansızca döyülməsi hadisəsində özünün təqsirli olduğunu etiraf etməsi üçün təzyiq göstərməyə başlayıblar.

Bu barədə Turan-a hazırda məhkəmədə daşqından ziyan çəkmiş vətəndaşların maraqlarının müdafiəsi üçün Şirvan şəhərində olan O.Gülalıyev özü bildirib. Onun sözlərinə görə, oğlu evdə təkdir.

Ə.Gülalıyev sentyabrın 23-də NZS qəsəbəsində naməlum şəxslərin hücumuna məruz qalıb. O, amansızca döyülüb və iki bıçaq xəsarəti alıb. -06D-