Əli Həsənov: Amerika bizim dostumuzdur, amma Dövlət Departamentinin hesabatı obyektiv deyil

Rəsmi Bakı Dövlət Departamentinin illik hesabatında Azərbaycanda insan hüquqları sahəsində problemlə bağlı tənqidi təkzib edir.

Prezident Administrasiyasının ictimai-siyasi şöbəsinin müdiri Əli Həsənov bildirib ki, Azərbaycan qərəzli tənqidi təkzib edir və bunu ölkənin daxili işlərinə müdaxilə kimi qiymətləndirir.

“ABŞ Dövlət Departamentinin konkret hesabatına gəlincə, qeyd etmək istərdim ki, ABŞ bizim strateji tərəfdaşımızdır. Bu dövlətlə münasibətlərin üç əsas istiqaməti var: energetika, təhlükəsizlik və demokratiya. Buna görə biz Dövlət Departamentinin hesabatında Azərbaycanda demokratiya və insan hüquqlarına diqqət yetirilməsinə normal yanaşırıq. Lakin hesabatın subyektiv xarakteri, informasiya mənbələri haqqında məlumatlar göstərilməsi, bəzi faktların təhrif edilməsi, ən əsası isə Azərbaycanın rəsmi orqanlarının mövqeyinə məhəl qoyulmaması sənədin obyektivliyini şübhə altına qoymağa tam əsas verir”, deyə Həsənov AzərTAc-a müsahibəsində bildirib.

Onun fikrincə, “hesabatda istənilən ölkə üçün səciyyəvi olan ayrı-ayrı mənfi hallar qabardılır, bir çox hallarda isə təhrif edilmiş informasiya verilir və onun əsasında ümumi rəy formalaşdırmaq cəhdi edilir”.

Həsənov hesabatda Azərbaycanda qəzetlərin tirajının nadir halalrda 5000 nüsxədən çox olduğunu oxuduqda özünü təhqir olunmuş hiss edib. Onun sözlərinə görə, “Yeni Müsavat”, “Azərbaycan”, “Zerkalo” və bir sıra digər qəzetlərin gündəlik tirajı 10 min nüsxədən çox olur.

Daha sonra Həsənov qürurla bəyan edir ki, əhalinin 70%-i İnternetdən istifadə edir. Həsənov bu gün Azərbaycanda Facebook istifadəçilərinin sayının bir milyon nəfərdən çox olmasını da hökumətin xidməti kimi təqdim edir.

Həsənov toplaşmaq azadlığının pozulması haqqında iddiaları da təkzib edir. “ən yaxşı müdafiə hücumdur” prinsipinə riayət edən Həsənov qərb ölkələrini iğtişaşlar zamanı sosial şəbəkələri məhdudlaşdırmaqda ittiham edib. 2011-ci ildə London yaxınlığındakı Totenhem adlı yerdə olduğu kimi.

Həsənov Nyu-Yorkda “Uoll Striti işğal et” aksiyasının da amansızca yatırıldığını xatırladır.

Qeyri-döyüş şəraitində əsgər ölümlərinin artması ilə bağlı tənqidə toxunan Həsənov iddia edir ki, bununla bağlı etirazlar erməni lobbisinin fitnəsidir.

Azərbaycan SQ texniki təchizatına, silah və döyüş sursatları ilə təminatına, nizam-intizamına və döyüş qabiliyyətinə görə Cənubi Qafqazda ən güclü ordudur. Bu amil erməni lobbisini, onların əlbirlərini və ermənilərin təsiri altında olan siyasi dairələri çox narahat edir. Məhz buna görə bu mövzu bu dərəcədə aktuallaşıb, Həsənov belə hesab edir.

Xarici və daxili qüvvələ bu məsələdən öz siyasi məqsədləri ilə istifadə etməyə və ordunun nüfuzunu sarsıtmağa çalışırlar, deyə Həsənov bildirib.

O, QHT-lərin sıxışdırılması ilə bağlı tənqidi təkzib edərək, bunun şəffaflıq məqsədilə edildiyini iddia edib.

“Artıq sirr deyil ki, ölkəmizdə fəaliyyət göstərən xarici təşkilatlar şübhəli layihələrə milyonlarla dollar qrant yönləndirir və heç bir hesabat vermir”, deyən Həsənov ABŞ Milli Demokratiya İnstitutunun Bakı nümayəndəliyini misal göstərib.

Həsənov “Eurovision” müsabiqəsindən sonra vətəndaş cəmiyyəti fəallarına hücumlarla bağlı öz ünvanına yer alan tənqidi də təkzib edir.

“Mən bu gün də əminəm ki, cəmiyyətimiz dövlətçiliyimizə qarşı fəaliyyət göstərən, onun əsaslarını sarsıtmağa çalışan, xarici erməniyönlü dairələrin əlində vasitəyə çevirənlərə qarşı barışmaz mövqe tutmalı, onları ifşa etməlidir”, deyə Həsənov bildirib. -06D-