Əli Həsənov siyasi məhbuslarn əfvi məsələsini prezidentin diqqətinə çatdıracaq (YENİLƏNİB)

Ölkə prezidentinin ictimai-siyasi məsələlər üzrə köməkçisi Əli Həsənovun bir sıra partiya liderləri ilə görüşündə siyasi məhbuslar məsələsi qaldırılıb.

Bu barədə Ə.Həsənov görüşdən sonra jurnalistlərə bildirib. Onun sözlərinə görə, əvvəlki iki görüşdə olduğu kimi, bir sıra partiya nümayəndələri “bəzi məhbuslar”la bağlı məsələ qaldırıblar və onların əfv olunmasımı xahiş ediblər.

Ə.Həsənov vəd edib ki, partiyaların müraciəti prezidentin diqqətinə çatdırılacaq. O, görüşü “səmərəli” adlandırıb.

Siyasi məhbuslar məsələsini qaldıranlardan biri Ümid Partiyasının lideri İqbal Ağazadədir. O hesab edir ki, siyasi məhbuslar problemi həll olunmalıdır.

İ.Ağazadə hakimiyyətin cəza məsələsinə seçici yanaşdğını qeyd edib. Belə ki, prokuror hüquq müdafiəçisi İntiqam Əliyevin 9 il müddətinə mühakimə olunmasını istəyir, ancaq Müdafiə Nazirliyinin 2 mln. manatı mənimsəmiş məmuruna şərti cəza istəyir.

“Deyirlər, İntiqam Əliyev siyasi məhbus deyil. Yaxşı, deyək ki, bu belədir. Lakin ona yanaşma siyasidir. Belə ki, o, hakimiyyətin xəttinə qarşı çıxır, dövlət əmlakını mənimsəyən şəxs isə hakimiyyətin xəttini dəstəkləyir. Bunu necə istəsəniz adlandırmaq olar, amma İntiqam Əliyev məhz siyasi yanaşma nəticəsində həbs olunub”, - İ.Ağazadə vurğulayıb. —0C06--

2015 May 15 (Cümə) 12:23:50

 Bu gün Beynəlxalq Mətbuat Mərkəzində  bir qrup müxalifəyönlü partiya sədrlərinin iştirakı ilə üçüncü iqtidar-müxalifət görüşü olub. Görüşdə prezidentin ictimai-siyasi məsələlər üzrə köməkçisi Əli Həsənov da iştirak edib.

O bildirib ki, Azərbaycan cəmiyyətində baş verən və ümummilli mahiyyət kəs edən məsələlər iqtidarla müxalifətin görüşünə ehtiyac yaradır.

“Ötən müddətdə Prezident Administrasiyasına siyasi partiyalardan görüşdə müzakirə üçün bəzi təkliflər daxil olub. Lakin faktiki hamının marağını kəsb edəcək və aktual olacaq ciddi təklif almamışıq. Yeganə olaraq “Azadlıq-2015” blokundan qarşıdan gələn parlament seçkiləri, seçki islahatları və siyasi partiyaların seçkilərdə iştirakı ilə bağlı ümumiləşmiş ciddi təklif daxil olmuşdu. Lakin hakimiyyət bu gün bu təklifi siyasi partiyalarla müzakirə etməyə hazır deyil və hazırda hakimiyyət olaraq siyasi partiyalarla seçki islahatları və qarşıdan gələn seçkiləri gündəmə çıxmağa lüzum görmürük. Ona görə də bu mövzudan vaz keçdik”,-  o bildirib.

Ə. Həsənovun   fikrincə,  bu gün Azərbaycan cəmiyyətini daha çox maraqlandıran Avropa Oyunlarının Azərbaycanda keçirilməsi, bu oyunlara daxildə və xaricdə münasibətdir: “Hesab edirik ki, cəmiyyətin siyasi institutları da bu məsələnin müzakirəsindən kənarda qalmamalıdır”.

Ə.Həsənov görüşdə siyasi partiyaları maraqlandıran cari məsələlərin də müzakirəyə çıxarılmasını təklif edib: “Siyasi partiyalar görüşün gedişində konkret məsələlərin müzakirəsini təklif edə bilər. Biz, ümumiyyətlə, gələcək görüşlərdə cari məsələləri ikinci məsələ kimi gündəliyə salmağı təklif edirik”.

Görüşdə iqtidar tərəfini Azərbaycan prezidentinin ictimai-siyasi məsələlər üzrə köməkçisi Əli Həsənov, şöbənin müdir müavini Tahir Süleymanov, şöbənin sektor müdiri Elman Paşayev, Azərbaycan Sosial Rifah Partiyasının sədri Xanhüsenyn Kazımlı təmsil edirlər.

Müxalifət tərəfdən isə  AXCP və Müsavat Partiyası  görüşdə iştirak etmir.

Digər partiyalardan  Vətəndaş Həmrəyliyi Partiyasının (VHP), Klassik Xalq Cəbhəsi Partiyası, Ümid Partiyası, Vəhdət Partiyası, Böyük Quruluş Partiyası, Bütöv Azərbaycan Xalq Cəbhəsi Cəbhəsi Partiyası, Azərbaycan Demokratik İslahatlar Partiyası (ADİP), Vətəndaş və İnkişaf Partiyası (VİP) Azərbaycan Demokrat Partiyası (ADP), Böyük Azərbaycan Partiyası (BAP), Ədalət Partiyası, Azərbaycan Sosial Demokratlar Partiyası (ASDP sədr Araz Əlizadə), Azadlıq Partiyası (Əhməd Oruc), Azərbaycan Milli İstiqlal Partiyası (AMİP) Aydınlar Partiyası, Milli Dirçəliş Hərəkatı Partiyası (Fərəc Quliyev) təmsil olunur.-03D-