Əliyev və Putin üçtərəfli razılaşmaların həyata keçirilməsini müzakirə ediblər

Bakı/31.05.22/Turan: Azərbaycan tərəfin təşəbbüsü ilə Vladimir Putinin Azərbaycan Respublikasının prezidenti İlham Əliyevlə telefon danışığı baş tutub, bu barədə bu gün Kremlin mətbuat xidməti məlumat yayıb.

Rusiya, Azərbaycan və Ermənistan liderlərinin 9 noyabr 2020, 11 yanvar və 26 noyabr 2021-ci il tarixli razılaşmalarının həyata keçirilməsinin gedişatı müzakirə olunub, regionda dinc həyatın bərqərar olması və sabitliyin möhkəmlənməsi, iqtisadi əlaqələrin və nəqliyyat kommunikasiyalarının açılması ilə bağlı konkret məsələlərin həllinə xüsusi diqqət yetirilib, deyə press-relizdə bildirilir.

İlham Əliyev Ermənistan baş naziri Nikol Paşinyan və Avropa Şurasının sədri Şarl Mişellə mayın 22-də Brüsseldə keçirilmiş görüş haqqında məlumat verib.

Ticari-iqtisadi sahədə ikitərəfli əməkdaşlığın bəzi aktual aspektləri müzakirə edilib. "2022-ci ilin fevralında Azərbaycan prezidentinin Moskvaya rəsmi səfərinin yekunları nəzərə alınmaqla, Rusiya-Azərbaycan strateji tərəfdaşlığının daha da dərinləşdirilməsi üzrə qarşılıqlı niyyət təsdiq edilib. Müxtəlif səviyyələrdə müntəzəm əlaqələrin davam etdirilməsi barədə razılıq əldə olunub", deyə Rusiya prezidentinin mətbuat xidmətinin məlumatında qeyd edilir. 06D