Əliyev və Sarkisyan danışıqları fəallaşdırmaq və yenidən görüşmək haqqında razılıq əldə ediblər (YENİLƏNİB)

Yerevan/19.11.13/Turan-Armİnfo: Ermənistan və Azərbaycan prezidentləri Qarabağ münaqişəsinin sülh yolu ilə həllinə nail olmaq məqsədilə gələcək danışıqlara təkan verməyə razılaşıblar.

Ermənistan prezidentinin mətbuat xidmətinin yaydığı məlumata görə, prezidentlər xarici işlər nazirlərinə həmsədrlərlə birgə sülh prosesinin intensivləşdirilməsi məqsədilə işi davam etdirməyi tapşırıblar. Onlar gələcək aylarda yenidən görüşmək barədə razılıq əldə ediblər.

Növbəti addım kimi həmsədrlər dekabrın 5-6-da Kiyevdə ATƏT XİN Şurasının iclasları çərçivəsində nazirlərlə işgüzar görüşlər təşkil edəcəklər. Həmsədrlər bu ilin sonuna qədər regiona səfər etməyi planlaşdırırlar.

Vyanadakı görüşün yekunlarına görə ATƏT-in Minsk Qrupunun həmsədrləri bəyanatla çıxış ediblər. Sənəddə deyilir: “Həmsədrlər Vyanada Sarkisyan və Əliyevi salamlayıblar. Prezidentlər buraya Dağlıq Qarabağ Münaqişəsinin sülh yolu ilə tənzimlənməsi haqqında müzakirələrin davam etdirilməsi üçün iki ölkənin xarici işlər nazirlərinin müşaiyəti ilə buraya gəliblər.

Görüşdə ATƏT-in Minsk Qrupunun həmsədrləri (Rusiya Federasiyası, Fransa, ABŞ), habelə ATƏT-in hazırki sədrinin Şəxsi Nümayəndəsi iştirak edib. Bu, Prezidentlərin 2012-ci ilin yanvarında Soçidə keçirilən sammitdən sonra ilk görüşü idi. Təkbətək görüş və ondan sonra həmsədrlər və nazirlərin iştirakı ilə keçirilən işgüzar görüş zamanı prezidentlər Dağlıq Qarabağ münaqişəsinin tənzimlənməsi ilə bağlı bir çox məsələləri müzakirə ediblər”.

Rəsmi Bakı hələlik görüşün yekunları ilə bağlı şərh vermir. -02D-

2013 Noyabr 19 (Çərşənbə axşamı) 16:52:06

Vyanada Ermənistan və Azərbaycan prezidentləri Serj Sarkisyan və İlham Əliyevin görüşü bu gün günün ikinci yarısında başa çatıb.

Prezidentlər Palais Coburg otelini mətbuat üçün heç bir bəyanat vermədən tərk ediblər. 

Görüşün yekunlarına görə ATƏT-in Minsk qrupu həmsədrlərinin bəyanat verəcəyi gözlənilir, xəbəri RİA-NOVOSTİ yayıb.

Bu, iki il sonra iki ölkə prezidentinin ilk görüşü idi. Gözlənildiyi kimi, görüşdə tərəflər etimad tədbirlərinin möhkəmləndirilməsi və Qarabağ nizamlanması üzrə danışıqların bərpası məsələlərini müzakirə ediblər.

Bir müddət əvvəl Ermənistan tərəfi snayperlərin cəbhə xəttindən çəkilməsi zərurəti haqqında məsələ qaldırıb, ATƏT MQ-nin həmsədri olan dövlət başçılarının bəyanatında isə hərbi bəyanatlara son qoymaq və xalqları sülhə hazırlamaq zərurəti vurğulanıb. -02D-