Elşən Kərimov "hakimiyyəti zorla ələ keçirməyə" çağırışda ittiham olunur

Rusiya vətəndaşı, Yevlax rayonunda atasının hüzür mərasimində saxlanılan Elşən Kərimov "hakimiyyəti zorla ələ keçirmək" çağırışlarında ittiham olunaraq cinayət məsuliyyətinə cəlb edilib.

Belə ki, Kərimova qarşı Azərbaycan Cinayət Məcəlləsinin 281.1-ci maddəsilə (hakimiyyətin zorla ələ keçirilməsinə və ya konstitusiya quruluşunun zorla dəyişdirilməsinə dair açıq çağırışlar, habelə bu məzmunlu materialların yayılması ) ittiham irəli sürülüb. Onu 5 ilə qədər həbs təhlükəsi gözləyir.

Aprelin 19-da Binəqədi Rayon Məhkəməsi onu 3 ay müddətinə həbs edib, vəkil Zibeydə Sadıqova bildirib. Müdafiə tərəfi həbsdən apellyasiya verib.

Kərimov Rusiya vətəndaşıdır, 1994-cü ildən Moskvada yaşayır. Ötən həftə atasının dəfn mərasimi üçün Azərbaycana gəlib və aprelin 17-də yas mərasimində saxlanılıb.

Hüquq-mühafizə orqanlarından şərh almaq mümkün olmayıb.

Bəzi məlumatlara görə, Elşən Kərimov Azərbaycan Xalq Cəbhəsi Partiyasının tərəfdarıdır. O, partiya fəallarının həbsi barədə məlumatları sosial şəbəkələrdə paylaşıb və Azərbaycanda bütün siyasi məhbusların azaldığa buraxılmasını tələb edib.