Е.Məmmədyarov İran diplomatı ilə nələri müzakirə edib?

Cümə günü Azərbaycan Respublikasının Xarici İşlər Naziri Elmar Məmmədyarov İranın Xarici İşlər Nazirinin müavini Seyid Abbas Ərakçının başçılıq etdiyi nümayəndə heyətini qəbul etmişdir.

Azərbaycan XİN-nin mətbuat xidmətinin məlumatına görə, görüşdə iki ölkə arasındakı münasibətlər, regionda cərəyan edən proseslər, Tehranda keçiriləcək Qoşulmama Hərəkatının Zirvə görüşü ilə bağlı məsələlər müzakirə olunmuşdur.

Nazir Elmar Məmmədyarov iki ölkə arasındakı münasibətlərin inkişafının vacibliyini qeyd etmiş və bu münasibətlərin regiondakı ümumi vəziyyətə təsir etdiyini bildirmişdir. Ermənistan tərəfindən Azərbaycan torpaqlarının işğalı faktının region üçün olduqca mənfi təsir etdiyini söyləyən Nazir Elmar Məmmədyarov, beynəlxalq təşkilatlar və ölkələrin Ermənistana təcavüzkar siyasətindən əl çəkməsi üçün təsir etmələrinin vacibliyini qeyd etmişdir. Həmçinin Nazir Elmar Məmmədyarov bütün ölkələrin, o cümlədən Ermənistanın BMT-yə və onun qərarlarına hörmətlə yanaşmalı olduğunu vurğulamışdır.

Eyni zamanda Nazir Elmar Məmmədyarov İranda həbs olunmuş azərbaycanlı şairlərlə bağlı məsələyə xüsusi diqqət yetirmişdir. Azərbaycanın Xarici İşlər Naziri bu məsələnin Azərbaycan xalqı və dövlətinin olduqca ciddi narahatçılığına səbəb olduğunu bildirmiş və məsələnin qısa müddət ərzində müsbət həllini tapacağına ümidvar olduğunu qeyd etmişdir.

İranın Xarici İşlər Nazirinin müavini Seyid Ərakçı ölkəsinin Azərbaycanla münasibətlərə böyük önəm verdiyini söyləmiş və İranın Azərbaycanın müstəqilliyinə, suverenliyinə və ərazi bütövlüyünə hörmətlə yanaşdığını bildirmişdir.

Həmin gün Azərbaycan Respublikasının Xarici İşlər Nazirinin müavini Xələf Xələfov İran Xarici İşlər Nazirinin müavini Seyid Abbas Ərakçının başçılıq etdiyi nümayəndə heyətini qəbul etmişdir.

Görüşdə Azərbaycan və İran arasındakı ikitərəfli məsələlər müzakirə olunmuş və perspektivləri barədə geniş fikir mübadiləsi aparılmışdır. Nazir müavini Xələf Xələfov Azərbaycana səfərindən öncə ölkəsində İran-Azərbaycan münasibətlərinə dair verdiyi müsahibəsinin təqdirəlayiq olduğunu qeyd etmişdir. Həmçinin Xələf Xələfov Azərbaycan və İran arasındakı əlaqələrin inkişafına töhfə verəcək konkret addımların atılmasını da vacibliyini vurğulamışdır.

Nazir müavini Xələf Xələfov qonşu ölkələr olan Azərbaycan və İran münasibətlərinin regiondakı ümumi vəziyyətə təsir etməsinin şübhə doğurmadığını bildirmişdir. Azərbaycanlı rəsmi iki ölkə arasındakı münasibətlərdə qarşılıqlı hörmət və ehtiram, daxili işlərə qarışmamaq, eyni zamanda suverenliyin və ərazi bütövlüyünün dəstəklənməsi prinsiplərinin fundamental olduğunu vurğulamış və bu strateji kursun əsasının Ümummilli Lider Heydər Əliyev tərəfindən qoyulduğunu söyləmişdir.

Ermənistanın bütün regional layihələrdən kənarda qalmasının səbəbi kimi Xələf Xələfov bu ölkənin işğalçı siyasətini göstərmiş və qeyd olunan siyasətin regionun inkişafına başlıca maneə olduğunu diqqətə çatdırmışdır.

İranda baş vermiş təbii fəlakətlə bağlı nazir müavini Xələf Xələfov Azərbaycan xalqının kədərləndiyini söyləmişdir.

Nazir müavini Seyid Ərakçı Azərbaycanda olmasından məmnunluq ifadə edərək, İranda baş vermiş zəlzələ ilə bağlı Azərbaycan tərəfinə humanitar yardıma görə minnətdarlığını bildirmişdir.

Nazir müavini Seyid Ərakçı İranın Azərbaycanla münasibətlərinin inkişaf etdirilməsində maraqlı olduğunu söyləmiş və İranın ölkəmizin ərazi bütövlüyünü dəstəklədiyini, Ermənistanı təcavüzkar ölkə kimi qəbul etdiklərini bildirmişdir.