Emin Hüseynov İTV baş direktoru vəzifəsinə seçkilərin nəticələrinin ləğvini tələb edir

Reportyorların Azadlıq və Təhlükəsizlik İnsitutunun (RATİ) direktoru, “İctimai TV”nin baş direktorluğuna keçmiş namizəd Emin Hüseynov baş direktor seçkilərinin qanun pozuntusu ilə keçməsinə dair çərşənbə axşamı RATİ-də mətbuat konfransı təşkil edib.

Seçkilərə 4 namizəd qatılıb. Namizədlər sənədlərini “İctimai TV”nin Yayım Şurasına (YŞ) aprelin 19-da təqdim ediblər, seçkilər isə aprelin 22-də keçirilib. Vaxt azlığı üzündəın seçkilərin 10 gün geri çəkilməsi təklif edilsə də, YŞ bunu qəbul etməyib. Namizədlərdən E.Hüseynov YŞ üzvlərinə seçki keçirildiyi halda legitim saymayacağını söyləyib. Nəticələri mübahisələndirmək üçün məhkəməyə müraciət edəcəyi xəbərdarlığı edib. E.Hüseyn buna əsas kimi seçki olmadan bəzi mətbu oqranlarda namizədlərdən Cəmil Quliyevin baş direktor seçiləcəyi haqda yazıların yer almasını göstərib.

Namizəd seçkilərin Milli Teleradio Şurasının (MTRŞ) qərargahında keçirilməsini də qanun pozuntusu adlandırıb. “Bu seçki yox, əsl qurama şou idi”, - deyə E.Hüseynov seçkinin nəticələrinə şərh verib. MTRŞ rəhbəri Nuşirəvan Məhərrəmlinin seçki prosesinə müdaxilə etməsi nəzərə çatdırılıb. “Bu adam faktiki seçki katibi rolu oynadı”, deyə E.Hüseyn MTRŞ rəhbərinin seçki prosesinə müdaxiləsini dəyərləndirib.

YŞ-nin 3 üzvünün yenicə təyin olunduğunu, tərkibinə seçildikləri qurumun fəaliyyətinin nədən ibarət olduğunu bilmədikləri deyilib. YŞ-nın bəzi üzvləri “kimə səs verək?” dedikdə F.Muradov bu şəxsləri C.Quliyevə səs verməyə yönləndirib. Bu faktın özü də qanun pozuntusu sayılıb. Fuad Muradov deputat, Yusif Babanlı isə İdman Akademiyasının prorektoru və Yeni Azərbaycan Partiyası Nərimanov təşkilatının rəhbər heyətində təmsil olunduğu üçün YŞ-a seçilmələri qanunsuz hesab edilib. 

YŞ üzvlərinin hər birinin iki namizədə səs verə bilməsi haqda qərar “absurd” adlandırılıb. Saçlarını tumarladığna və gülümsəməsinə görə Qafqaz Müsəlmanları İdarəsinin təmsilçisi Fuad Nurullayev E.Hüseynova münasibətdə “qeyri-ciddi adam” ifadəsi işlədib. E.Hüseynov bu iradı şəxsiyyətinə qarşı ayrı-seçkilik kimi dəyərləndirib. 

E.Hüseynov mətbuat vasitəsilə YŞ-na müraciət edərək, seçkilərin nəticələrini ləvğ etməyi təklif edib. Belə olmazsa rəsmi olaraq məhkəməyə müraciət olunacağı bildirilib. Bununla bağlı Avropa Məhkəməsilə artıq yazışmalara başlandığı nəzərə çatdırıb.  

Bundan başqa, YŞ-nın tərkibinə etimadsızlıq üçün bir sıra QHT-lərlə birgə imzatoplama kampaniyasına başlanılacağı qeyd olunub. -05C-