Entoni Blinken: “Azərbaycanın Müstəqilliyi Günündə ABŞ ölkənin suverenliyinə dəstəyini təsdiqləyir”

Bakı/28.05.22/Turan: Şənbə günü Vaşinqton Azərbaycanın müstəqilliyinə və suverenliyinə, o cümlədən Azərbaycan xalqının hüquq və azadlıqlarının dəstəklənməsinə öz sadiqliyini bir daha təsdiqləyib, Turan-ın Amerikadakı müxbiri bildirib.

“Amerika Birləşmiş Ştatları adından Azərbaycan xalqını Müstəqillik Günü münasibətilə təbrik edirəm”, - dövlət katibi Entoni Blinkenin bəyanatında deyilir.

“Bu il biz Birləşmiş Ştatlar və Azərbaycan arasında diplomatik münasibətlərin 30 illiyini qeyd edirik. Azərbaycanın Sovet İttifaqından müstəqil olduğu üç onillikdə biz Avropanın enerji təhlükəsizliyinin inkişafında, transmilli təhdidlərlə mübarizədə və ikitərəfli münasibətlərin, o cümlədən ticarət və investisiya sahələrində əlaqələrin irəliləməsində güclü tərəfdaşlara çevrilmişik”, - Blinkenin bəyanatında deyilir.

“Biz Azərbaycanın terrorizmə və qanunsuz ticarət şəbəkələrinə qarşı qlobal mübarizəyə verdiyi töhfəni, habelə Ukraynaya dəstəyinizi, xüsusilə humanitar yardımınızı dərindən qiymətləndiririk”, - ABŞ dövlət katibi qeyd edib.

Blinkenin sözlərinə görə, Birləşmiş Ştatlar "nəinki möhkəm iqtisadi əlaqələr sayəsində, həm də adamlarımız arasındakı əlaqələr sayəsində münasibətlərimizi genişləndirməkdə davam etməkdən qürur duyur".

“Minlərlə Azərbaycan və Amerika vətəndaşı birlikdə çalışıb və təhsil alıb, yenilik etmək, əməkdaşlıq etmək və bir-birinin təcrübəsindən  faydalanmaq imkanı əldə edib", - daha sonra Blinken qeyd edib.

ABŞ həmçinin Azərbaycanı ölkə Konstitusiyasında əks olunmuş hüquq və azadlıqların müdafiəsinə yönələn demokratik islahatlar istiqamətində addımlar atmağa çağırır.

ABŞ Azərbaycan və Cənubi Qafqaz regionu üçün dinc, demokratik və çiçəklənən gələcəyə yardım etməyə sadiqdir. "Biz uzunmüddətli və hərtərəfli sülhə nail olmaq üçün ikitərəfli əsaslarla və həmfikirlərimizlə bilrikdə fəaliyyət göstərərək  kömək etməyə hazırıq", - Blinken deyib.

“Qlobal qeyri-müəyyənliyin hökm sürdüyü bu çətin dövrdə Birləşmiş Ştatlar Azərbaycanın müstəqilliyinə və suverenliyinə, eləcə də Azərbaycan xalqının hüquq və azadlıqlarının dəstəklənməsinə sadiqliyini bir daha təsdiqləyir”, - Blinken fikrini yekunlaşdırıb.

Aleks Raufoğlu

Vaşinqton.-0--