Erdoğan: Ankara, Moskva və Bakı Qarabağda dinc prosesə töhfə verib

Bakı/25.11.20/Turan: Türkiyə prezidenti Tayyip Erdoğan Rusiya, Türkiyə və Azərbaycanın Dağlıq Qarabağda “ədalətsizliyin aradan qaldırılmasına” böyük töhfə verdiyini bəyan edib, xəbəri RİA Novosti yayıb.

“Biz Qarabağda 30 ildir davam edən ədalətsizliyin aradan qaldırılmasına böyük töhfə verdik. Dünən mənim hörmətli Putinlə telefon danışığım oldu, biz Qarabağda problemlərin həlli üçün atılacaq addımları müzakirə etdik. Türkiyə, RF və Azərbaycan regionda sülhün zamini olacaqlar”, deyə Erdoğan bildirib.

O, həmçinin qeyd edib ki, Rusiya və Türkiyədən başqa, digər ölkələr də Dağlıq Qarabağda sülhün təmin edilməsinə cəlb edilə bilər.

“Bu prosesi genişləndirmək olar və biz dünən prezident Putinlə bu barədə danışdıq”, deyə Erdoğan Türkiyə parlamentində çıxış edərkən bildirib.

Çərşənbə axşamı Türkiyə və Rusiya prezidentləri Recep Tayyip Erdoğan və Vladimir Putinin telefon söhbətində Qarabağda atəşkəsin motinorinqi üzrə mərkəzin yaradılması məsələlərini müzakirə etdikləri barədə məlumat verilib. Türkiyə tərəfin nümayəndələri bildiriblər ki, Erdoğan söhbət zamanı adı çəkilən mərkəzin ən qısa zamanda fəaliyyətə başlamasının tərəfdarı olduğunu bəyan edib.

Dünən Türkiyənin Müdafiə Nazirliyinin rəhbəri Hulusi Akar adı çəkilən regionda sülhə nəzarət mexanizmləri üzərində iş getdiyini bildirib. Onun sözlərinə görə, Qarabağ ərazisində tikiləcək müşahidə məntəqələri arasında patrul nəzarəti həyata keçiriləcək. -02D-