Ərdoğan KİV-i kütləvi şəkildə bağlayır

Türkiyə hakimiyyəti dövlət çevrilişinə cəhddən sonra 16 telekanal, 3 informasiya agentliyi, 23 radiostansiya,  45 qəzet, 15 jurnal və 29 nəşri bağlayır. Bu barədə çərşənbə günü Rəsmi Gəzetə bildirib.

Qeyd olunur ki, bu qərar iyulun 20-də Türkiyədə üç ay müddətinə tətbiq edilən fövqəladə vəziyyət rejimi çərçivəsində qəbul olunub. Əsasən Barış TV, Bugün TV, Can Erzincan TV, Dünya TV, Hira TV, Irmak TV, Kanal 124, Kanaltürk, MC TV, Mehtap TV, Merkür TV, Samanyolu Haber, Samanyolu TV, SRT TV, Tuna Shopping TV, Yumurcak TV, Cihan, Muhabir və SEM agentlikləri bağlanır.

100-ə yaxın KİV işçisi həbs edilib. Bundan əlavə, Türkiyədə dövlət çevrilişinə cəhdə bağlılıqda şübhəli bilinənlərin kütləvi həbsi davam edir. Saxlanılanların sayı 15 min nəfəri ötüb. Onların 10 min nəfərdən çoxu hərbçidir. Bu barədə DİN rəhbəri Əfkan Alu bildirib,  Reuters CNN Turk-ə istinadən məlumat yayıb.

Hakimiyyət bildirib ki, cevriliş cəhdində ölkə Silahlı Qüvvələrinin şəxsi heyətinin 1,5% -i  - 8 min 651 hərbçi iştirak edib. Qiyamçıların sərəncamında 246 ədəd zirehli texnika,  74 tank və 3 gəmi olub. Bu məlumatı çərşənbə günü Türkiyə Baş Qərargahı açıqlayıb.

Qiyam yatırıldıqdan sonra dövlət orqanlarında kütləvi təmizləmə əməliyyatı başlayıb. Ölkədə üçaylıq fövqəladə rejim tətbiq edilib və Avropa  İnsan Hüquqları Konvensiyasının fəaliyyəti dayandırılıb. Hakimiyyət ölüm hökmünü qaytarmaq istəyir.-02D-