Erməni tərəfi Sankt-Peterburq görüşünün yekunlarından razıdır

Yerevan/21.06.16/Turan-Arminfo: Ermənistan xarici siyasət idarəsinin rəhbəri Edvard Nalbandyan hesab edir ki, Rusiya, Ermənistan və Azərbaycan prezidentlərinin 20 iyun Sankt-Peterburq görüşü “konstruktiv şəraitdə keçib”.

O, jurnalistlərlə söhbətində deyib: “Görüş yetərincə faydalı olub və müəyyən ehtiyatlıqla deyə bilərəm ki, konstruktiv şəraitdə keçib”, - E.Malbandyan vurğulayıb. XİN rəhbərinin sözlərinə görə, prezidentlər bəzi məsələlərlə bağlı anlaşmaya nail olublar. “Əgər həmin məsələlər üzrə razılıq əldə olunsa nizamlanmada irəliləyişə nail olmaq mümkündür”, - o bildirib.

Nalbandyan bildirib ki, həm prezidentlər, həm də XİN rəhbərləri səviyyəsində görüşün davam etdirilməsi barədə razılıq əldə olunub. “Proses ATƏT-in Minsk Qrupu formatında keçiriləcək”, - nazir dəqiqləşdirib. “Təsadüfü deyil ki, yekun mərhələdə danışıqlara Rusiya, Fransa və ABŞ-ı təmsil edən ATƏT-in Minsk Qrupunun həmsədrləri dəvət olunublar”, - o qeyd edib.

Həmçinin Sankt-Peterburq görüşündə ATƏT-in fəaliyyətdə olan sədrinin şəxsi nümayəndəsinin komandasının imkanlarının genişləndirilməsi barədə razılıq əldə olunub.  Nazir xatırladıb ki, Vyana və Sankt-Peterburq görüşləri arasındakı müddətdə Azərbaycan müxtəlif bəyanatlarla çıxış edib ki, bunları da “çətin ki konstruktiv adlandırmaq mümkün olsun”. Bu kontekstdə nazir narahatlıqla bildirib ki, Sankt-Peterburqda üç liderin iştirakı ilə görüşün keçirildiyi bir vaxtda Azərbaycan 25 min əsgər, ağır artilleriya və silahların iştirakı ilə irimiqyaslı hərbi təlimlər keçirir. “Düşünmürəm ki, belə görüş öncəsi bu, konstruktiv yanaşmanın təzahürüdür”, - Nalbandyan vurğulayıb.   -02D-