Ermənista XİN başçısı: Bizimlə təhdid dilində danışa bilməyəcəklər

Bakı/27.06.19/Turan: Ermənistan üçün Dağlıq Qarabağın fiziki təhlükəsizliyi prioritetdir. Bizimlə təhdid dilində danışmaq nəticə verməyəcək. Bu barədə Ermənistan XİN başçısı Zöhrab Mnatsakanyan iyunun 27-də keçirilən mətbuat konfransında Azərbaycan prezidenti İlham Əliyevin son bəyanatını şərh edərkən bildirib.

Mnatsakanyan həmsədrlərin tərəflərə Vaşinqtonda təklif etdikləri sənədlərin və təkliflərin mövcudluğu haqqında suala cavab verməkdən yayınıb.

Onun sözlərinə görə, görüş gərginliyin artması şəraitində keçib və tərəflər gərginliyin azaldılması imkanlarını müzakirə ediblər.

Mnatsakanyan deyib ki, insanlar arasında əlaqələr və ədavətin təbliğini istisna edən mühitin yaradılması, gərginlik risklərinin azaldılması üzrə iş zəruridir. "Gərginlik şəraitində səmərəli irəliləyişin mümkün olduğuna inanmırıq. Danışıqlarda təhdid dili işləmir. Biz özümüzə inanırıq və bizimlə təhdid dilində danışa bilməyəcəklər", deyə erməni KİV-ləri Mnatsakanyandan sitat gətirir. -02D-