Ermənistan baş naziri və müdafiə naziri hədələyir

Yerevan/03.09.13/Turan-Armİnfo: 2000-ci ildən 2007-ci ilə qədər Ermənistan SQ minimum silah ehtiyatı yığırdı, lakin 2007-ci ildən etibarən Azərbaycan silahlarının üstünlüklərinə əks təsir göstərə biləcək silahar alınır. Bu barədə jurnalistlərlə söhbətində Ermənistanın müdafiə naziri Seyran Ohanyan bildirib.

“Söhbət zenit-raket komplekslərinin, düşmənin təkcə arxa cəbhədəki deyil, daha uzaqdakı infrastruktur obyektlərini də məhv etmək iqtidarında olan uzaqvuran silahların alınmasından gedir. Bu, bizə Bakının Ermənistana qarşı aqressiv əməliyyatlarından yayınmasına “kömək etmək” imkanı verəcək. Azərbaycanın silah almaq imkanlarının böyük olmasına baxmayaraq, biz mövcud silahların keyfiyyətli şəkildə mənimsənilməsi, qorunub saxlanması və müasirləşdirilməsi hesabına qüvvələrin balansını saxlamağa müvəffəq oluruq”, deyə Ohanyan bildirib.

Elə bu gün Qarabağda səfərdə olan Ermənistanın baş naziri Tigran Sarkisyan bildirib ki, Ermənistan son üç ildə silah alışını dəfələrlə artırıb.

Belə ki, Dağlıq Qarabağda hərbi hissələrdən birinə baş çəkdiyi zaman o bildirib ki, son 3 ildə Ermənistan əvvəlki 20 ildə aldığından daha çox silah alıb.

“Hökumətin mühüm vəzifəsi ölkəmizin təhlükəsizliyini təmin etməkdir. Bu, müasir ordu, müasir silah deməkdir. Bu nöqteyi-nəzərdən biz heç vaxt qüvvələr balansının pozulmasına imkan verməyəcəyik. Məhz buna görə ordunun silahlanması prosesi Ermənistan prezidentinin diqqət mərkəzindədir və Ermənistan SQ-nin silahlanması işinə strateji tərəfdaşlarımız da töhfə verir”, deyə o bildirib. -02D-