Ermənistan Parlamenti Qarabağın müstəqilliyinin tanınması layihəsini qəbul etmədi

Noyabrın 12-də Ermənistan Parlamenti “İrs” partiyasının deputatı Zarua Postancyanın Dağlıq Qarabağın müstəqilliyinin tanınmasını nəzərdə tutan qanun layihəsini qəbul etməyib.

Səsvermə başlamazdan əvvəl Ermənistanın hakim Respublikaçılar Partiyasının deputatı Artak Zakaryan bildirib ki, Dağlıq Qarabağın tanınması məsələsi dördüncü dəfədir parlamentin gündəliyinə daxil edilib. “Bir şey aydındır: lazımi vaxta, belə bir zərurət yarandıqda bu təşəbbüsü bütün deputatlar dəstəkləməlidir. Amma hazırda bizim fraksiyamız səsvermədə iştirak etməyəcək”, deyə o bildirib.

Ermənistan KİV-lərinin məlumatına görə, deputatların əksəriyyəti sadəcə olaraq səsvermədə iştirak etməyiblər.

“Daşnaksütun” və “İrs” istisna olmaqla, parlament qüvvələrinin nümayəndələri səsvermədə iştirak etməməyi qərara alıblar, çünki Ermənistanın Dağlı Qarabağı təktərəfli olaraq tanıması münaqişənin ATƏT-in Minsk Qrupu çərçivəsində tənzimlənməsi prosesini “korlayacaq”.

“Daşnaksütun” bildirib ki, sənədə ona görə səs verir ki, onun əleyhinə səs verilməsi ölkə hüdudlarından kənarda spekulyasiya predmetinə çevrilər. “Bu, Ermənistanın Dağlıq Qarabağın müstəqilliyini tanımaq istəməməsi kimi təfsir edilə bilər”, deyə daşnakların lideri Armen Rustamyan bildirib.

Bir müddət əvvəl Ermənistan prezidenti Serj Sarkisyan bildirib ki, Azərbaycan müharibəyə başlasa, Yerevan Dağlıq Qarabağı tanıyacaq. -02D-