Ermənistana nəql edilən qaz üç həftə boyunca Azərbaycan ərazisindən keçəcək

Bakı/17.03.21/Turan: “Şimali Qafqaz – Zaqafqaziya” qaz kəmərinin (bu kəmər vasitəsilə Rusiya qazı Gürcüstandan keçməklə Ermənistana nəql edilir) təmiri ilə əlaqədar Rusiya qazının Ermənistana nəqli müvəqqəti olaraq Azərbaycan ərazisindən həyata keçiriləcək, bu barədə İnterfaks”Qazprom eksport”a istinadla məlumat verir.

““Şimali Qafqaz – Zaqafqaziya” qaz kəmərində planlaşdırılmış profilaktik təmir işləri zamanı Rusiya qazı istehlakçılara Azərbaycan ərazisindən nəql ediləcək. “Qazprom eksport” Məhdud Məsuliyyətli Cəmiyyəti və Azərbaycan Respublikası Dövlət Neft Şirkəti martın 16-da Rusiya qazının Azərbaycan ərazisindən nəqli haqqında qısamüddətli müqavilə imzalayıb”, deyə Rusiya tədarükçüsü yazır.

“Müqavilədə “Şimali Qafqaz – Zaqafqaziya” magistral qaz kəmərinin Rusiya hissəsində planlaşdırılmış profilaktik təmir işləri zamanı istehlakçılara tədarük edilən qazın Gürcüstanla sərhədə qədər Azərbaycan ərazisindən keçəcəyi nəzərdə tutulur. Təmir işləri təxminən üç həftəyə qədər çəkə bilər. Təmir başa çatdıqdan sonra qaz əvvəlki kimi RF və Gürcüstan sərhədindən keçən marşrutla nəql ediləcək”, deyə “Qazprom eksport” əlavə edir.

Beləliklə, Azərbaycan Ermənistana qarşı xoş məram jesti edib, Yerevanın bunu qiymətləndirib-qiymətləndirməyəcəyini yaxın gələcək göstərəcək. -02D-