Ermənistanda vəziyyət gərginləşir

Ötən gecə Yerevanda mitinqçilərlə polis arasında yeni qarşıdurma baş verib. Nəticədə 150-dən çox adam saxlanılıb, 70-dən çox adam xəsarət alaraq xəstəxanaya düşüb. Onların 30-a yaxını polis işçisidir.

İki həftədir davam edən etirazları fərqləndirən məqam iyulun 17-də Yerevanda post-polis xidməti alayını zəbt edən 30 nəfər silahlı şəxsdən ibarət qrupun əhali tərəfindən dəstəklənməsidir. Onların prezident Sarkisyanın istefa tələbinə minlərlə adam qoşulub. Onlar müntəzəm küçə mitinqləri keçirir, polislə qarşıdurma yaradırlar.

Etirazları müxalifət də dəstəkləyir.

Hakimiyyət vəziyyətin kəskinləşməsindən qorxaraq silahlı qrup ilə razılığa gəlməyə ümid edir. Lakin bunun əksi baş verir. Hər gün ölkədə vəziyyət pisləşir, Yerevandan kənarda da hökumət əleyhinə aksiyalar başlayır. 

Bundan əlavə, Qarabağ klanı ilə Yerevan erməniləri, həmçinin Sarkisyanın tərəfində olan oliqarx qrupları ilə onların ordu və güc qurumlarındakı əleyhdarları arasında ziddiyyət artır.

Qeyd edək ki, etirazların başında ASALA-nın keçmiş üzvü Alek Yeniqomşyan olmaqla, açıq terrorçular durur. O, Monte Melkonyanın keçmiş silahdaşı, Fransa terror aktının iştirakçısıdır. Terrorizmə görə mühakimə olunan Yeniqomşyan sonradan ermənilər tərəfindən qəhrəmanlaşdırılıb və Yerevana gedib. Dünənə qədər isə polis alayını ələ keçirən terrorçu qrupun nümayəndəsi rolunda çıxış edib.

Uzun illər ərzində ilk dəfədir ki, erməni cəmiyyəti güclü şəkildə parçalanıb.

İndiki halda vəziyyət vətəndaş müharibəsi və rejimin dəyişdirilməsi elementləri ilə gərginləşə bilər.

Etirazlar güc yolu ilə yatırılarsa erməni cəmiyyəti parçalanmış vəziyyətdə qalacaq və bütün problemlərə görə məsuliyyət Sarkisyan rejiminin üzərinə düşəcək.

Sabitliyin pozulmasında katalizator və ən güclü sınaq Qarabağ münaqişəsinin nizamlanmasının mərhələli variantı olacaq ki, Ermənistanda da bunu istəmirlər. Lakin ermənilər bu qərarın qəbulunu nə qədər çox  uzatmağa cəhd göstərsələr, şərtlər onlar üçün daha ağır olacaq.-02В-