Əvəz Zeynallı: Ramiz Mehdiyev və Gülər Əhmədova məhkəməyə çağırılsın

Yanvarın 9-da Ağır Cinayətlərə dair İşlər üzrə Məhkəmədə Ramella Allahverdiyevanın sədrliyi ilə “Xural” qəzetinin redaktoru Əvəz Zeynallının işi üzrə növbəti məhkəmə iclası keçirilib. 

Üçsaatlıq iclas sayca 35-ci oldu, Zeynallının sözlərinə görə, məhkəmə yuxarıdan göstəriş gözlədiyi üçün prosesi qəsdən uzadır.

Redaktor məhkəməni və dövlət ittihamçısını bütün vəsatətlərini rədd etməkdə və ya təmin etməməkdə ittiham edir. Bu vəsatətlərin ən əsası əsas ittihamçı – keçmiş deputat Gülər Əhmədovanı məhkəməyə gətirməkdir.

Hakim Allahverdiyevanın Əhmədovanın ev dustaqlığında olması haqqında replikasına cavabda redaktor onun polisin yardımı ilə məhkəmədə iştirakını tələb edib.

Əvəz Zeynallı deputat Gülər Əhmədovanın pul tələb etmək ittihamı ilə həbs edilib. Onun şikayəti ilə 28 oktyabr 2011-ci ildə Baş Prokurorluq nəzdində Korrupsiyaya qarşı Mübarizə İdarəsi 311.3.3-cü (böyük məbləğdə rüşvət alma) və 311.3.4-cü (qorxutma yolu ilə rüşvət alma) maddə ilə cinayət işi açıb.

Bir il sonra Əhmədova özü deputat mandatlarının satılması ilə bağlı fırıldaqçılıqda ifşa edilib, sonradan əlbiri Sevinc Babayevanın ölümündə ittiham olunub.

“Niyə fırıldaqçılıqda və adam öldürməkdə ittiham olunan, uşaq satışı ilə məşğul olan şəxs evdə oturur, məh isə heç bir dəlil olmadan il yarımdır həbsdəyəm?”, deyə Zeynallı bildirib.

O, Əhmədovanı Prezident Administrasiyasının rəhbəri Ramiz Mehdiyevin başçılıq etdiyi şaxələnmiş cinayətkar şəbəkənin üzvü adlandırıb. 

Zeynallı Mehdiyevin, Prezident Administrasiyasının şöbə müdiri Əli Həsənovu, KİV-də dövlət dəstəyi fondunun sədri Vüqar Səfərlini məhkəməyə dəvət etməyi tələb edib.

O, həmçinin yalançı şahidliyə görə onun cinayət işini saxtalaşdıran Baş Prokurorluğun Korrupsiyaya qarşı Mübarizə İdarəsinin müstəntiqi Qalib Qasımova qarşı cinayət işi açılmasını tələb edib. 

Məhkəmənin növbəti iclası yanvarın 16-na təyin edilib. -0-