Fransa Xarici İşlər Nazirliyinin  rəhbəri  Bakını Yerevanla sülh müqaviləsini imzalamağa çağırıb

Fransa Azərbaycandan Birləşmiş Millətlər Təşkilatı COP29 İqlim Konfransına qədər Ermənistanla sülh danışıqlarında irəliləyiş gözləyir. Bu barədə Fransanın xarici işlər naziri Stefan Sejurne bazar ertəsi Yerevanda erməni həmkarı Ararat Mirzoyan ilə birgə keçirdiyi mətbuat konfransında bildirib.

"Fransa hər iki ölkənin suverenliyinə, ərazi bütövlüyünə hörmətlə yanaşmaqla ədalətli və sabit sülh yaradacaq müqavilənin tezliklə imzalanmasının tərəfdarıdır. 1991-ci ildə Almatıda imzalanmış sənədin bütün mənası bundadır. Praqada ictimaiyyətə də eyni ideya təqdim edildi" ,- "Sputnik Armeniya"  Sejurnedən sitat gətirib.

Fransa eyni prinsiplər əsasında dövlətlər arasında sərhədin delimitasiyası prosesinə də kömək edir. Parisdə hesab edirlər ki, Cənubi Qafqaz sülh və əməkdaşlıq regionuna çevrilməlidir, - xarici işlər naziri qeyd edib .

"Ermənistan sülh istəyir. Fransa, beynəlxalq birlik sülh istəyir. Azərbaycan tezliklə COP29-u qəbul edəcəyi üçün məsuliyyət daşıyır: tədbirdən əvvəl səmimi olaraq sülhə nail olmaq istədiyini göstərməlidir. Düşünürəm ki, biz bu məsələdə sürətlə irəliləməyi bacarmalıyıq", –  nazir deyib.

Ermənistanın  xarici işlər naziri Ararat Mirzoyan da Azərbaycanla sülh sazişi imzalamağa hazır olduqlarını bildirib.

"Ermənistan Azərbaycanla sülh müqaviləsini mümkün qədər tez imzalamağa hazırdır", - o deyib və əlavə edib ki, bu məsələ ilə bağlı vəziyyəti fransalı həmkarı ilə müzakirə edib.

"Biz razılaşdırılmış mətni tezliklə imzalamağa hazırıq. Ölkələrin ərazi bütövlüyünün, Almatı bəyannaməsinin, SSRİ-nin süqutu zamanı mövcud olan sərhədlərin qarşılıqlı olaraq tanındığı müqaviləni",-  Mirzoyan deyib.