Fransanın Ermənistandakı səfiri Qarabağ üzrə mediator funksiyasını öz üzərinə götürüb

Bakı/23.07.21/Turan: Fransanın Yerevandakı səfiri Con Lakot Bakı və Paris arasında yeni gərginlik dalğasına səbəb ola biləcək növbəti bəyanatlarla çıxış edib.

Belə ki, iyulun 23-də o, “Azadlıq Radiosu”nun Ermənistan xidmətinə müsahibəsində deyib: “Qarabağda müharibənin başa çatmasından səkkiz ay sonra aydın olur ki, 9 noyabr tarixli bəyanat bütün məsələləri həll etmir. Onun bəzi müddəaları, xüsusən hərbi əsirlərin azad edilməsi haqqında müddəası ümumiyyətlə yerinə yetirilmir. Və ümumiyyətlə 9 noyabr bəyanatında Qarabağın gələcək statusu haqqında heç nə deyilmir. Beləliklə, 9 noyabr bəyanatı birinci mərhələ idi, amma indi sülhü möhkəmləndirmək, atəşkəsə nail olmaq və ATƏT-in Minsk Qrupunun rəhbərliyi altında Ermənistan və Azərbaycan arasında siyasi prosesə başlamaq lazımdır”, deyə Lakot bildirib.

Fransa prezidentinin Ermənistana səfərinin nə zaman baş tutacağı barədə suala cavabda səfir deyib ki, səfər “ən faydalı olacağı zaman baş tutacaq. Faydalı zaman isə onun regionda siyasi prosesi irəlilətməyə, problemli məsələlərdə irəliləyişə nail olmaqda Ermənistana və Azərbaycana kömək etməyə imkan verəcək zamandır. Beləliklə, səfər tarixləri və parametrləri bu məqsədə uyğun şəkildə müəyyən ediləcək”, deyə səfir bildirib.

O, həmçinin qeyd edib ki, səfər regional olacaq. “Prezident Makronun bütün region liderləri ilə danışıqlar aparması məntiqli olacaq. Bizim bütün tərəflərlə danışıqlar aparmaq, vasitəçi rolunu təmin etmək, Ermənistan və Azərbaycan arasında siyasi prosesə yardım etmək imkanımız var”, deyə o bildirib.

ABŞ, Rusiya, Fransa və Böyük Britaniya səfirlərinin 9-10 iyun tarixlərində Şuşaya səfər etməkdən imtinasının nə demək olduğu barədə suala cavabda səfir deyib: “Dağlıq Qarabağın statusu ATƏT-in Minsk Qrupu çərçivəsində danışıqlar yolu ilə müəyyən edilməlidir. Nə qədər ki, bu status müəyyən edilməyib, nə Fransanın Bakıdakı səfiri, nə Fransanın Yerevandakı səfiri Qarabağa səfər edə bilməz. Bakıdakı həmkarım Şuşaya səfər etmir, eləcə də mən Stepanakertə səfər etmirəm. Və Minsk Qrupunun həmsədri olan üç ölkə də bu mövqeyi tutur. Bu arada, Fransa Qarabağda daha geniş beynəlxalq iştirakın tərəfdarıdır. İndi orada yalnız Beynəlxalq Qırmızı Xaç Komitəsi var. Hesab edirik ki, BMT-nin agentlikləri də Dağlıq Qarabağda iştirak etməlidir”. -02D-