Freedom House: Azərbaycanda İnternet qismən azad idi və belə də qalmaqdadır

Freedom House hüquq müdafiə təşkilatı bu gün dünyanın 60 ölkəsində İnternetin vəziyyəti haqqında illik hesabatını dərc edib.

Bu güniş araşdırmanın müəlliflərinin gəldiyi ümumi nəticələr belədir: bütün dünyada İnternet azadlığı pisləşir, fəallara təzyiqlər güclənir.

Müxtəlif ölkələrin hakimiyyətləri veb-kontentə nəzarət üçün yeni qanunlar qəbul edir, sosial media fəallarının həbslərinin sayı artır.

Hakimiyyətlər fərqli siyasi düşüncənin və vətəndaş fəallığının yatırılması məqsədilə İnternet üzərində bütün mümkün filtr və nəzarət vasitələrindən istifadə edirlər.

İslandiya və Estoniya İnternetdə daha çox azadlıq olan ölkələr siyahısına başçılıq edir.

Çin, Kuba və İran İnternet azadlığı nöqteyi-nəzərdən daha repressiv ölkələr elan edilib.

Azərbaycan siyahıda 39-cu yerdədir və ötən il də olduğu kimi, İnternet nöqteyi-nəzərdən qismən azad elan edilib. Eyni zamanda, Azərbaycan mətbuatı qeyri-azad elan edilib.

Azərbaycanda həbs edilmiş blogerlər və fəalalr var, hakimiyyəti tənqid edən saytlara kiberhücumlar olur, istifadəçilərin yazışmaları xüsusi xidmətlər üçün açıqdır və onları çox vaxt vətəndaşlara qarşı ittiham kimi irəli sürürlər, İnternetdə fikrin ifadəsi ilə bağlı qanunvericilik sərtləşdirilir.

İnternetin keyfiyyəti aşağıdır, xüsusən də bölgələrdə.

Bütün bu nəticələr hesabatda çoxsaylı faktlar və konkret hadisələrlə təsdiq edilir.

Ötən illə müqayisədə, ölkənin göstəriciləri iki bənd pisləşib, deyə məruzədə qeyd edilib. -02D-