Gənclər təşkilatları Dəyanət Babayevə azadlıq tələb edirlər

Vətəndaş Həmrəyliyi Partiyasının Gənclər Təşkilatı AXCP Gənclər Komitəsinin üzvü Dəyanət Babayevə qarşı cinayət işi qaldırılmasını pisləyən bəyanat yayıb. 

D.Babyev bu il noyabrın 17-də keçirilən aksiyadan sonra 7 günlük inzibati həbsə məhkum edilib. İnzibati həbs başa çatdıqda gənc fəala qarşı cinayət işi başlanması iqtidarın ictimai fəallara növbəti repressiyası kimi dəyərləndirilib. 

Tofiq Səlimov adlı şəxsin D.Babayevi xuliqanlıqda ittiham edərək polisə şikayət verməsi əsassız adlandırılır. Bu, həm də hüquq-mühafizə orqanlarının icra hakimiyyətinin əlində qoçu dəstəsinə çevrilməsinin sübutu kimi dəyərləndirilir. Bu hadisə Azərbaycanda insan haqlarının, ifadə azadlığı və demokratiyanın hansı acınacaqlı durumda olduğunu təsdiqləyən faktlardan biri sayılır.

Müəlliflər iqtidarı bu addımlardan çəkinməyə, vətəndaş qarşıdurması, itaətsizlik, dövlət qurumlarına inamsızlıq kimi mənfi tendensiyanı aradan qaldırmağa çağırır. Müəlliflərə görə, bu addımlar vətəndaş qarşıdurmasını gücləndirməklə ölkədə vətəndaş-dövlət münasibətlərini inamsızlıq müstəvisinə keçirir. Belə mənfi halların ölkənin gələcəyini çox böyük təhlükəyə atdığı iddia edilir. Son olaraq, müəlliflər rəsmi Bakıdan D.Babayevi dərhal azadlığa buraxmağı tələb edirlər. 

Eyni məzmunlu bəyanatla Siyasi Azadlıqları Müdafiə Alyansı (SAMA) da çıxış edib. Qurum son zamanlar müxalif gənc fəalların həbslərindən narahatlıq ifadə edir və D.Babayevin həbsini pisləyir. Gənc siyasi fəala qarşı Cinayət Məcəlləsinin 221.2.1-ci (xuliqanlıq) maddəsi ilə cinayət işi qaldırılması əsassız sayılır. SAMA D.Babayevin həbsinin qanun pozuntuları ilə müşayiət edildiyini bildirir. Belə ki, D.Babayev təcridxanadan polis idarəsinə gətirilərkən ailə üzvlərinə xəbər verilməyib, vəkillə təmin edilməyib. D.Babayev Nəsimi RPİ-də saxlanıldığı halda məsul polis zabitləri gənc fəalın orada olmadığını bildiriblər. SAMA D.Babayevin həbsini iqtidarın gənc fəallara qarşı təzyiq və təqiblərin davamı sayaraq, iqtidarı gənc fəallara qarşı təzyiq və təqiblərə son qoymağa, D.Babayevi azadlığa buraxmağa çağırır. -05D-