Statistika qadın zorakılığının ilbəil artdığını qeydə alır

“Təmiz Dünya” ictimai birliyi bazar ertəsi Beynəlxalq Mətbuat Mərkəzində “Qadınlara qarşı gender əsaslı zorakılıq və Azərbaycan” mövzusunda dəyirmi masa keçirib. 

Birliyin sədri Mehriban Zeynalova rəsmi mənbələrə isnadən 2011-ci ildə ölkədə məişət zorakılığı zəminində 1782 cinayət hadisəsi qeydə alındığını deyib.

Cinayətlərin 74%-i döymə, 20,5%-i qəsdən sağlamlığa az ağır və yüngül xəsarət yetirmə, 1,7%-i adam öldürmə ilə bağlıdır. Cinayətlərin 10%-i əvvəl cinayət törətmiş şəxslər tərəfindən, 10%-i sərxoşluq halında törədilib.

2012-ci ilin ötən müddəti ərzində bu zəmində qeydə alınan 773 cinayət hadisəsindən 790 qadın zərər çəkib. İctimai birlik məişət zorakılığı əsasında 2005-ci ildə 15, 2010-cu ildə 109, 2011-ci ildə 135, 2012-ci ilin ötən müddəti ərzində 38 qadının qətlə yetirildiyini bildirir. 

Bəzi atalar sözləri misal gətirilərək, bu misallar milli mentalitetdə qadına-qıza aşağılayıcı münasibətin təzahürü kimi dəyərləndirilib. Məişət zorakılığına bu mövqeyin də təsir göstərdiyi iddia edilib. 

“Məişət zorakılığı” haqqında qanun qəbul olunsa da, onun işləməsi üçün mexanizmlərin olmadığı nəzərə çatdırılıb. Qadınları məişət zorakılığından müdafiə edəcək sığınacaqların hazırlanmamasına diqqət çəkilib. Digər tərəfdən, məişət zorakılığı hallarının artmasına baxmayaraq, cəmiyyətin bu zorakılığa fəal etirazının olmadığı vurğulanıb. Qadınlara qarşı məişət zorakılığının artmasına daha bir səbəb kimi qadın polislərin azlığı göstərilib. Belə ki, kişi polislər qadınlara qarşı məişət zorakılığı məsələsində həmcinslərilə həmrəylikdə, bu zorakılıqları ciddiyə almamaqda ittiham ediliblər. Bununla bağlı qadın polislərin sayının artırılması təklifi səsləndirilib. 

Ağırlaşan sosial durumun da məişət zorakılığına təkan verdiyi qeyd edilib. Çox zaman ailə başçısının hansısa problemi həll edə bilməməsinə görə ailə üzvlərindən, ən çox da xanımlarından acıq çıxmaları vurğulanıb.   

Qadınların hakimiyyətdə az sayda təmsil olunmaları ayrı-seçkiliyin, gender bərabərlyi prinsipinin pozulmasının göstəricisi kimi dəyərləndirilib. Qadınların hakimiyyətdə təmsil olunmaları üçün müəyyən kvotalar ayrılması onların layiq olduqları qiyməti almaları yox, hansısa siyasi mülahizələrin nəticəsi sayılıb. 

Məişət zorakılığını minimuma endirə bilmək üçün bu zorakılığa qarşı qanunun işləmə mexanizmlərinin hazırlanması təklif edilib. Bu zorakılığa qarşı mübarizə üçün polis orqanlarında qadın polislərin sayının artırılması təklifi irəli sürülüb. Zorakılığa məruz qalan qadınların müdafiəsi üçün sığınacaqlar tikilməsi məsələsi qaldırılıb. Bu sahədə ciddi kütləvi təbliğat, əsaslı maarifləndirmə sisteminin qurulmasının zəruriliyi qeyd edilib. -05C-