Rəsmi Tbilisinin mövqeyi Azərbaycanın münasibətinə adekvat sayılmadı

Milli Dirçəliş Hərəkatı Partiyası (MDHP) bazar ertəsi Beynəlxalq Mətbuat Mərkəzində “Gürcüstan azərbaycanlılarının problemləri”nə dair mətbuat konfransı keçirib. 

Partiya sədri, deputat Fərəc Quliyev Gürcüstanda bu yaxınlardakı hakimiyyət dəyişikliyindən sonra azərbaycanlıların durumunun ağırlaşmasına diqqət çəkib. 

Gürcüstanın yeni baş naziri İvanişvilinin imzalanmış neft müqavilələrinə yenidən baxacağı və Rusiyadan Ermənistana dəmiryol blokadasının aradan qaldıracağı bəyanatları təhlükəli bəyanatlar adlandırılıb. Nəzərdə tutulan bu addımların Azərbaycanın Gürcüstana münasibətinə adekvat olmadığı xüsusi vurğulanıb. 

2008-ci ildə Rusiyanın təcavüzü zamanı Gürcüstan azərbaycanlılarının Gürcüstanın ərazi bötüövlüyünə sədaqət göstərdiyi xatırladılıb. 

Rusiyada yaradılan Rusiya Azərbaycanlıları Təşkilatları İttifaqının (RATİ) üzvü, əslən Gürcüstan azərbaycanlısı, “AzərRos” ictimai birliyinin başçısı Söyün Sadıqovun Rusiyadakı erməni ictimai birliklərilə əməkdaşlıq çağırışları kəskin tənqid edilib. Qafqazda hələ də davam edən münaqişələrin qalması Rusiyanın ssenarisi kimi dəyərləndirilib. “Sadval” təşkilatının fəallaşdırılması, Azərbaycanda “talış birliyi”nin təsis edilməsi Rusiyanın Azərbaycanda etnik azlıqlar problemi yaratmaq cəhdi kimi dəyərləndirilib. Son vaxtlar Gürcüstanda azərbaycanlı ailələrin basqınlara məruz qalması da xüsusi müzakirə edilib. Gürcüstan Azərbaycanlıları Konfederasiyasının rəhbəri Daşqın Gülməmmədov bunu dövlət siyasəti yox, Saakaşvili hökumətindən olan bəzi şəxslərin əməllərinin nəticəsi adlandırıb.

Gürcüstan azərbaycanlılarının ümumi problemlərinə də toxunulub. Gürcüstan azərbaycanlılarının milli təhsil, torpaq, hakimiyyətdə təmsilçilik, dini problemləri olması iddia edilib. Gürcüstanda təhsil haqqında qanunun gürcü dilindən başqa dildə təhsil almağı qadağan etməsi nəzərə çatdrılıb. Bundan çıxış yolu kimi azərbaycanlıların yaşadığı Qvemo-Kartli bölgəsində azərbaycan dilinə regional dil statusu verilməsi təklif edilib. Borçalı bölgəsində torpaqların çoxluq təşkil edən azərbaycanlılara yox, yerli olmayan ayrı-ayrı gürcülərə verilməsindən narazılıq ifadə olunub. Gürcüstanda azərbaycanlıların hakimiyyətdə yetərli sayda təmsil olunmamalarına səbəb kimi gürcü dilini bilməmlərinin göstərilməsi əsassız sayılıb. Gürcü dilini kifayət qədər yaxşı bilən azərbaycanlılar olmasına baxmayaraq, onların belə hakimiyyətdə təmsil olunmadıqları göstərilib. 

Natiqlər rəsmi Bakını, ölkənin vətəndaş cəmiyyəti institutlarını Gürcüstan azərbaycanlılarının problemlərinə diqqətlə yanaşmağa, bu problemlərin həllində fəal iştiraka çağırıblar. -05C-