Gənclərin insan haqları ilə bağlı filmlərinin təqdimatı keçirilib

“Media Hüquqları Mərkəzi” (MHM) ictimai birliyi gənclər arasında Azərbaycanda insan haqları problemlərinə həsr edilmiş qısametrajlı filmlərin çəkilişi prosesini başa vurub. Bu xəbər Turan-a birlikdən daxil olub.         

Bu məqsədlə bu gün “Park İNN” otelində təqdimat mərasimi keçirilib. Layihəni gerçəkləşdirməkdə məqsəd ölkə vətəndaşlarının təməl haqları problemlərinin məhz gənclər tərəfindən gündəmə gətirilməsidir. Bununla yanaşı, gənclərin nyu-media vərdişlərinin inkişaf etdirilməsi, intellektual səviyyələrinin artırılması, cəmiyyətə inteqrasiya prosesinə dəstək olmaq da diqqət mərkəzində durub. 

Filmlərin hazırlanmasına universitet tələbələri, gənclər təşkilatlarının təmsilçiləri və fəal gənclər cəlb olunublar. Filmlər əsgər ölümləri, söz və ifadə azadlığı, seçki hüququ, siyasi hüquqlar, neft gəlirlərindən əldə olunan vəsaitlərin ədalətli və şəffaf bölgüsü, qadın hüquqları, sosial hüquqlar kimi ictimai-siyasi proseslərə həsr edilib.

Tədbirə Azərbaycandakı səfirliklərin, beynəlxalq qurumların təmsilçiləri, ekspertlər, vətəndaş cəmiyyətinin tanınmış simaları, gənclər və mətbuat təmsilçiləri qatılıblar. Filmlər nümayiş etdirilib, ekspertlər bu filmləri dəyərləndirərək, təklif, rəy, tövsiyə və iradlarını səsləndiriblər. Filmlərin müəllifləri olan gənclər filmlərin yaradılması haqda fikirlərini ifadə ediblər. 

Tədbirdə nümayiş etdirilən filmlərin müəllifləri Atilla Cavid, Elvin Elxan, Nazlı Pəncəliyeva, Aynur Zərrintac, Emil Bağırov, Könül Yazar, Nuron Məmmədov, Məhəmməd Səməd, Gülnur Novruzova və Gunay İlyasovadır. -05D-