Gülər Əhmədova hakim partiyadan qovuldu

Hakim “Yeni Azərbaycan” partiyası deputat Gülər Əhmədovanı öz sıralarından çıxardı. Partiyanın sədr müavini Əli Əhmədovun verdiyi məlumata görə, “partiya onun əməllərindən dərin təəssüf hissi keçirir”.

Gülər Əhmədovanın əməlləri partiyanın prinsip və dəyərləri ilə bir araya sığmır. “Biz Gülər Əhmədovanın dələduzluq hərəkətlərini ölkənin hakim partiyasına ləkə kimi qiymətləndiririk. Eyni zamanda o da şübhəsizdir ki, Gülər Əhmədova törətdiyi dələduzluq əməlləri ilə Yeni Azərbaycan Partiyasını Milli Məclisdə təmsil etməyə mənəvi haqqını artıq itirmişdir. Yeni Azərbaycan Partiyasının hər bir üzvünün mövqeyi məhz belədir”, deyə hakim partiyanın saytı Əli Əhmədovdan sitat gətirir.

O, həmçinin qeyd edib ki, “ayrı-ayrı adamların qanunazidd hərəkətləri ölkəmizdə həyata keçirilən siyasətin üzərinə kölgə salmaq iqtidarında deyil”.

“qanunçuluq, şəffaflıq, korrupsiyaya qarşı barışmaz mübarizə və s. kimi mənəvi dəyərlər və fəaliyyət prinsipləri hakimiyyətin əsasını təşkil edir: "Qanunu pozanlar, mənəviyyatını itirənlər, dələduzlar isə həmişə ifşa olunub, olunur və bundan sonra da ifşa olunacaq”, deyə Əhmədov bildirib.

Faktla bağlı cinayət işi açılıb. Hüquq - mühafizə orqanları öz üzərlərinə düşən zəruri araşdırmaları aparır və inanıram ki, hər kəsin əməlinə qanun çərçivəsində ədalətli qiymət veriləcək, deyə Əhmədov sonda bildirib.

Əhmədovun bəyanatlarından göründüyü kimi, növbəti addım Əhmədovanın deputat mandatından məhrum edilməsi və cinayət məsuliyyətinə cəlb edilməsi ola bilər. -06D-